Shkruar nga Pamfleti
'Xhisiela' çon në Prokurori Lulzim Bashën, kreu i PD përballje të fortë me drejtësinë dhe Taulant Ballën
Kreu i Partisë Demokratike, Lulzim Basha, ka mbërritur këtë mesditë në Prokurorinë e Tiranës për të dëshmuar për çështjen ‘Xhisiela’, dosja që ka trazuar jo pak politikën shqiptare.
Basha është ftuar të paraqitet këtë të premte në Prokurorinë e Tiranës, për të dhënë deklarime, pasi është kallëzuar nga kreu i grupit parlamentar të Partisë Socialiste, Taulant Balla, për kallëzim të rremë e shpifje.
Sipas Ballës, kryeopozitari në bashkëpunim me ish-nënkomisarin Emiljano Nuhu e gazetarin Basir Collaku, sajuan një skenar me qëllim dëmtimin e imazhit të tij. Kjo lidhet me denoncimin publik që ish-nënkomisari Nuhu, bëri gjatë një interviste që realizoi me gazetarin Basir Collaku, ku pretendonte se është kërcënuar me armë në zyrën e tij të punës në stacionin e policisë së Fushë Krujës, në prani të deputetit socialist Balla.
Emiljano Nuhu pretendon se gjithcka ndodhi në momentin kur tentoi të arrestonte Rexhep Rrajën, djalin e deputetit socialist Rrahman Rraja, i cili ishte denoncuar nga ish-e dashura Xhisiela Maloku për dhunë e përndjekje.
Intervista e Nuhut u transmetua edhe nga selia e PD dhe Lulzim Basha hodhi akuza të rënda ndaj socialistit Balla. Për të gjitha këto, kryedemokrati pritet të japë shpjegime sot përpara grupit të hetimit.
