Këngëtarja e njohur me famë botërore, Dua Lipa është në Tiranë prej ditës së djeshme, për të performuar për festën e pavarësisë së Shqipërisë.
Gjatë qëndrimit të saj ditën e sotme, ambasadorja e SHBA-së, Yuri Kim ka pozuar krah Dua Lipës.
Në llogarinë e saj në “Twitter”, Kim shkruan se e ka uruar qytetaren më të re të Shqipërisë, pasi Dua ditën e djeshme mori pasaportën shqiptare.
Më tej ambasadorja nuk ka nguruar të shprehë dhe emocionet për koncertin i cili do të mbahet mbrëmjen e sotme nga Dua me rastin e 110 vjetorit të Pavarësisë së Shqipërisë.
“E lumtur për të uruar qytetaren më të re të Shqipërisë dhe e emocionuar për koncertin e Dua Lipës sonte për të festuar 110 vjetorin e Pavarësisë së Shqipërisë”, shkruan Yuri Kim.
