Pothuajse dy muaj pas vdekjes së tij, ndarja nga jeta e Diego Maradonës vazhdon të prodhojë fakte të reja, e fundit nga ato që raportohen nga gazetat spanjolle është kjo: Dr. Leopoldo Luque ka falsifikuar firmën e Diegos. Raporti ka mbërritur pas krahasimit me dokumentet që ishin gjetur gjatë kontrollit në shtëpinë e Luque. Sot, një ekspertizë kaligrafike konfirmon dyshimet e prokurorëve që hetojnë vdekjen e padrejtë të Maradonas për shkak të keqpërdorimit ose neglizhencës mjekësore.
Kështu, është provuar zyrtarisht se dikush ka falsifikuar firmën e Maradonës për të hyrë në të dhënat e tij private mjekësore. Në dokumentin që u vlerësua orët e fundit, ekziston një tekst drejtuar selisë së arkivit të Klinikës Olivos të datës 1 shtator 2020 me tekstin e mëposhtëm: “Nga konsiderata ime më e lartë unë, Diego Armando Maradona, kërkoj të dorëzoj tek mjeku im personal Dr. Leopoldo Luque, një kopje të historisë time mjekësore. Faleminderit shumë “. Poshtë tekstit është edhe firma e Maradonës.
Tani duhet pritur se çfarë do të bëjë Prokuroria, megjithatë Neni 84 i Kodit Penal parashikon “një dënim me burgim nga një deri në pesë vjet burgim për ata që, përmes mosrespektimit, neglizhencës ose mungesës së aftësisë profesionale, shkaktojnë vdekjen e një personi tjetër”. Sapo të mbarojë faza e mbledhjes së provave, do të mblidhet një komision mjekësor me profesionistë prestigjiozë të specializimeve të ndryshme për të përcaktuar nëse ka pasur apo jo neglizhencë në kujdesin mjekësor të periudhës së fundit të Diego Armando Maradona.
Të dyshuarit janë Leopoldo Luque dhe psikiatri Agustina Cosachov, dy profesionistë të cilët, sipas dokumenteve, ishin ekipi mjekësor që trajtonte Maradona gjatë qëndrimit të tij në shtëpinë me qira në lagjen San Andrés, në Tigre.
