Policia ka proceduar penalisht dy persona për ngjarjen në QSUT. Ashensori i qendrës spitalore është bllokuar dhe ka rënë duke shkaktuar dëme të lehta te një pacient dhe te një punonjës i spitalit.
Bëhet me dije se Specialistët për Hetimin e Krimeve në Komisariatin e Policisë Nr. 4 proceduan penalisht në gjendje të lirë, për veprën penale “Shkelja e rregullave të mbrojtjes në punë”, shtetasit:– Ermal Braja, 45 vjeç, banues në Tiranë, me detyrë teknik ashensori; – Ardian Sulollari, 52 vjeç, banues në Tiranë, me detyrë administrator i firmës së ashensorëve.
“Procedimi penal ndaj këtyre shtetasve filloi pasi më datë 15.05.2022, rreth orës 23:30, në spitalin “Nënë Tereza”, në katin -1, barelisti, shtetasi K. D., duke transportuar me barelë shtetasen V. C., paciente në spital, për shkak të një defekti janë bllokuar brenda në ashensor dhe si pasojë janë dëmtuar. Materialet i kaluan Prokurorisë, për veprime të mëtejshme procedurale”, tha policia.
Ndërkohë është zbardhur dhe dinamika e ngjarjes. Në momentin që punonjësi shëndetësor po fuste me barelë brenda në ashensor 80-vjeçaren, dera është mbyllur duke zënë barelën. Punonjësi shëndetësor ka arritur të mbajë me forcë derën e ashensorit dhe ka larguar pacienten nga barela që të mos dëmtohej. Më pas kanë ngecur të dy në pjesën e brenda ashensorit, ndërsa barela është shtypur nga dera e ashensorit.
