Mbrëmjen e djeshme Brukseli u tmerrua nga të shtëna armësh, ku mbeti i ekzekutuar me 8 plumba një emigrant shqiptar. Ditën e sotem është zbardhur identiteti i viktimës dhe bëhet fjalë për Ardit (Arjan) Spahiun nga Elbasani.
Mësohet se viktima, 38-vjeçar, ka qenë më i arrestuar në 2010-ën për vrasjen e një 52-vjeçari në Elbasan, Gëzim Alikajt, ndaj edhe policia belge dyshon se vrasja e tij mund të jetë bërë për motive hasmërie.
Sipas mediave belge ai u qëllua me 8 plumba në zonën e njohur, Molenbeek dhe ndërroi jetë në vend.
Dyshohet se 38-vjeçari qëndronte ilegalisht në Belgjikë. Në vendin e ngjarjes, prokuroria kërkoi një ekspert të balistikës dhe një mjek ligjor si dhe një kontroll laboratorik nga policia federale dhe një gjyqtar ekzaminues, konfirmon Sarah Durant, zëdhënëse e zyrës së prokurorit publik të Brukselit.
