Pas Parkut Kombëtar të Butrintit, një tjetër pasuri publike kalon në duart e PPP-ve. Bëhet fjalë për Pallatin e Brigatave.
Ministria e Kulturës i ka hapur rrugën menaxhimit të integruar Ansamblit Historik të Pallatit të Brigadave, me partner strategjik, me arsyetimin se duhet të jetë i aksesueshëm nga të gjithë dhe të kthehet në pikë turistike.
Nevoja është promovimi dhe krijimi i të ardhurave nga vizitorët, duke e kthyer atë në atraksion turistik. Në plan-projekt citohet se kjo pronë do t’i mbesë shtetit dhe vetë Ministria e Kulturës do të garantojë që menaxhimi me investitorë strategjikë – me qëllim promovimin për grumbullimin e të ardhurave – të zbatohet pa cenuar hapësirën dhe vlerat e tij.
“Kjo hapësirë do të kthehet në hapësirë mikpritëse për personalitete të ndryshme dhe do të jetë e hapur për organizime kulturore dhe edukative, ku çdo përdorues do të paguajë një tarifë,”- thuhet në shkresë, duke e mbështetur nismën në ligjin e ndryshuar në 2018-ën, që u hap rrugë institucioneve shtetërore të bëjnë menaxhimin e integruar edhe me palë të tjera, edhe për sitet arkeologjike.
Ansambli i ri do të ketë edhe funksion akomodues për personalitete shqiptare dhe të huaja, të cilët vijnë për vizitë në vendin tonë. Sipas qeverisë, vënia në zbatim e kësaj nisme do të bëhet përmes një partneriteti të quajtur PMI (Plan Menaxhimi i Integruar), pjesë e të cilit do të jenë një grup ekspertësh të fushave të ndryshme, që e njohin këtë monument.
Menaxhimi do të bëhet në partneritet me një periudhë prej 20 vitesh, ku pala e interesuar duhet të ketë financimin e duhur dhe përvojën për rijetëzimin e Ansamblit të Pallatit të Brigadave.
“Një konsideratë duhet pasur për mbikëqyrjen e aktiviteteve nga një bord profesionistësh të fushës, që kontrollojnë dhe garantojnë që të ruhen vlerat e monumentit. Ky bord do të ketë në përbërjen e tij specialist të menaxhimit, jurist, botanistë, historian dhe restauratorë të arkitekturës dhe do të shërbejë si një këshillues për menaxhimin,”- thuhet më tej në vendim.
Vlen të theksohet se, më herët qeveria – pavarësisht debateve të shumta dhe mohimeve nga Ministria e Kulturës – i hapi rrugën menaxhimit nëpërmjet formës së Partneritetit Publik-Privat (PPP) të Parkut Kombëtar të Butrintit, për 10 vjet (2020-2030)./ Pamfleti
