Presidenti Volodymyr Zelensky është shprehur se Ukraina po përgatitet për një sulm të ri në rajonin lindor të Donbasit.
Që nga dështimi për të marrë Kievin në fillim të pushtimit në fund të shkurtit, kontrolli i Donbasit është bërë një nga objektivat kryesore të Moskës.
“Ne po përgatitemi për përpjekje të reja të Rusisë për të sulmuar në Donbas, për të intensifikuar disi lëvizjen e saj në jug të Ukrainës”, tha Presidenti Zelensky në fjalimin e tij të natës.
“Okupatorët ende nuk duan të pranojnë se janë në një qorrsokak dhe i ashtuquajturi ‘operacion special’ i tyre tashmë ka falimentuar”, shtoi ai.
Ai i bëri thirrje edhe një herë Perëndimit që të vendosë një embargo të naftës ndaj Rusisë.
“Ne po punojmë gjithashtu për të forcuar sanksionet ndaj Rusisë. Partnerët duhet të marrin vendime që kufizojnë lidhjet e Rusisë me botën çdo javë. Okupatorët duhet ta ndjejnë koston në rritje të luftës për ta, ta ndjejnë vazhdimisht, u shpreh presidenti i Ukrainës. /BBC
