Lëvizja Vetëvendosje me qendër në Shqipëri ka zyrtarizuar sot dy kandidaturat për zgjedhjet e 25 prillit 2021
Bëhet me dije se në Tiranë do të kandidojë Boiken Abazi, ndërsa në Lezhë do të kandidojë Iliaz Shehu. Prezantimi i dy kandidatëve u bë nga ish-këshilltari i ish-kryeministrit Albin Kurti, Elvis Hoxha, përmes një konference për media të mbajtur mesditën e sotme.
Kujtojmë se “Vetëvendosje” përfshihet për të parën herë në zgjedhjet parlamentare në Shqipëri. VV-ja në Shqipëri ka thënë se angazhimi i tyre në zgjedhje synon të ofrojë një alternativë në mënyrë që shqiptarët të mos ndihen të detyruar të largohen. VV u shpreh se qytetarët kanë të drejtë të bëhen bashkë për të propozuar ato kandidatë, të cilët mendojnë se i përfaqësojnë të drejtat e tyre.
Qendra e Lëvizjes Vetëvendosje u regjistrua në Shqipëri më 11 mars të vitit 2019 dhe që prej nisjes së veprimtarisë ka qenë aktive në nisma dhe protesta që janë zhvilluar në Tiranë.
Gjatë intervistave në media aspiranti për kryeministër të Kosovës Albin Kurti ka deklaruar se Qendra e Vetëvendosjes në Shqipëri është e pavarur dhe i merr vendimet në autonomi të plotë.
Edi Rama ka shkëmbyer replika në distancë me Albin Kurtin lidhur me aktivitetin politik të Lëvizjes VV në Shqipëri, ku gjatë lajmërimit të një marshimi me rastin e 28 nëntorit në Tiranë, e cilësoi si “lajthitje” nismën e kreut të VV.
