Tashmë është përcaktuar data e zgjedhjeve të pjesshme vendore në 6 bashki, por Elisa Spiropali thotë se emrat e kandidatëve nuk janë diskutuar ende në Kryesinë e Partisë Socialiste. Gjatë një interviste për ‘Kontrast’ në Report Tv, Spiropali nuk përjashtoi që të gjashta kandidatet të jenë edhe gra.
“Mund ta thoni me plot gojën se mund të jenë edhe të 6 kandidatet gra. S’ka rëndësi gjinia, por cilësia e karakterit” – tha Spiropali.
Referuar situatës në Partinë Demokratike, ministrja deklaroi se fatkeqësisht kjo forcë politike është në garë për partinë dhe jo për bashkitë.
“Fatkeqësisht PD është në garë se kush do të marrë partinë dhe jo kush do të fitojë bashkitë. Kush do të marrë kështjellën dhe kush do të mbajë çelësat” – tha ministrja.
E ndalur tek deklaratat e presidentit Ilir Meta se Lulzim Basha ka shitur opozitën, Spiropali tha se “opozita është në një garë hunjsh”.
“Këta janë në një garë të ethshme me njëri tjetrin, se kush është më pranë Edi Ramës etj. Pra edhe në garën e tyre ne vihemi në mes pa asnjë arsye. Një garë e vogël kjo dhe pa qëllime kombëtare. Garën për bashkitë nuk e shohim si një referendum popullor, apo si një ndjenjë revanshi. Do të hyjmë me kandidatët më të mirë të mundshëm. Ndërsa opozita është në një garë hunjsh” – tha Elisa Spiropali.
