Shkruar nga PamfletiShtetet e Bashkuara të Amerikës kanë ngrirë të gjitha asetet që i përkasin grupit rus Wagner , që është cilësuar si një organizatë kriminale transnacionale nga Amerika.
Departamenti i Thesarit të Shtetit njoftoi se sanksionet synojnë dhjetëra degë të Grupit Wagner, duke përfshirë disa në Republikën e Afrikës Qendrore, Emiratet e Bashkuara Arabe, si dhe presidentin e Koncernit të Kalashnikovit të Rusisë ak-47.
“Ndërsa sanksionet dhe kontrollet e eksporteve ndaj Rusisë nga koalicioni ynë ndërkombëtar vazhdojnë të kafshojnë, Kremlini po kërkon me dëshpërim armë dhe mbështetje, duke përfshirë edhe grupin brutal Wagner për të vazhduar luftën e tij të padrejtë kundër Ukrainës. Sanksionet e sotme të zgjeruara ndaj Wagner-it, si dhe sanksionet e reja ndaj bashkëpunëtorëve të tyre, do të pengojnë më tej aftësinë e Putinit për të armatosur dhe pajisur makinën e tij të luftës”, tha Sekretarja e Thesarit, Janet Yellen në një deklaratë.
Sanksionet goditën gjithashtu kompaninë kineze Changsha Tianyi Space Science and Technology Research Institute, e njohur gjithashtu si Spacety China, e cila ka furnizuar filialet e Wagner Group me imazhe satelitore të Ukrainës që mbështesin operacionet ushtarake të Wagner atje.
Departamenti i Shtetit vendosi gjithashtu 531 anëtarë të ushtrisë ruse në listën e zezë, për veprime që kërcënojnë ose cenojnë sovranitetin, integritetin territorial ose pavarësinë politike të Ukrainës.
“Ky veprim mbështet qëllimin tonë për të degraduar kapacitetin e Moskës për të bërë luftë kundër Ukrainës, për të promovuar përgjegjësinë për ata që janë përgjegjës për luftën e agresionit të Rusisë dhe abuzimet e lidhura me to, dhe për të bërë presion të mëtejshëm mbi sektorin e mbrojtjes së Rusisë”, tha Sekretari i Shtetit Antony Blinken.
