Një vatër zjarri është përhapur në mjediset e spitalit Covid 3 në Tiranë, i cili ndodhet në ish-repartin e kirurgjisë në Qendrën Spitalore Universitare “Nënë Tereza”.
Burime bëjnë me dije se në zonën ku ka rënë zjarri nuk ka pasur pacientë. Flakët janë përhapur në katin e dytë, në zyrën e një mjeku dhe dyshohet se shkak ka qënë një ngrohës i ndezur. Për momentin nuk raportohen të lënduar, ndërkohë që zjarrfikësit kanë vënë nën kontroll situatën.
Sistemi i infrastrukturës së kësaj godine është i amortizuar, ndonëse iu bë një riparim i pjesshëm, duke u shfrytëzuar si spital covid-i. Autoritetet kanë planifikuar, që kur të mbyllet cikli i kësaj pandemi, kjo godinë, ish-kirurgjia e përgjithshme, të shembet.
Njoftimi i policisë:
Me datë 27.11.2021, te spitali “Covid 3” ka rënë zjarr, në një nga zyrat e administratës, ku ka vetëm dëme materiale.
Shërbimet zjarrfikëse kanë bërë të mundur fikjen e zjarrit.
Grupi Hetimor është në vendngjarje dhe po punon për sqarimin e rrethanave të rënies së zjarrit.
