FLASH
Shkruar nga Pamfleti
Me dhjetëra mijëra qytetarë marshuan në rrugët e Budapestit këtë fundjavë, në atë që pritet të jetë parada më e madhe e krenarisë në historinë e Hungarisë, përballë një klime të ashpër ligjore dhe politike të krijuar nga qeveria konservatore e kryeministrit Viktor Orban.
Organizatorët vlerësojnë se mbi 200 mijë njerëz morën pjesë në marshimin e Pride-it, duke sfiduar ndalimet policore dhe presionin e politikanëve nacionalistë për të ndaluar çdo shfaqje publike që mbështet komunitetin LGBTQ+.
Policia hungareze kishte shpallur ndalimin e ngjarjes duke u mbështetur në një ligj të ri për “mbrojtjen e fëmijëve”, që në praktikë ndalon çdo tubim apo simbol që shihet si “promovues i homoseksualitetit”.
Orban, në një intervistë për radion shtetërore, minimizoi mundësinë e përplasjeve fizike, por paralajmëroi për pasoja ligjore:
“Policia ka autoritetin të ndërhyjë. Ne jemi një shoqëri qytetare, nuk e lëndojmë njëri-tjetrin. Por do të ketë pasoja ligjore”, tha ai.
Pjesëmarrësit rrezikojnë gjoba deri në 500 euro, ndërsa organizatorët mund të përballen me një vit burgim. Policia ka leje të përdorë teknologjinë e njohjes së fytyrës për të identifikuar qytetarët.
Luca, 34 vjeçare, e cila mori pjesë bashkë me nënën e saj Enikö, deklaroi:
“Kemi një ligj që ndalon njerëzit e ndryshëm të mblidhen. Jemi këtu sepse kjo cenon të drejtat tona.”
E shqetësuar për të ardhmen e vajzës së saj katërvjeçare, Luca shtoi: “Ajo po rritet në një vend ku nuk mund të dashurojë kë të dojë.”
Barnabás, 22 vjeç, i cili nuk është pjesë e komunitetit, erdhi nga fshati për të treguar solidaritet: “E di si është të mos të shohin, të të trajtojnë si të padukshëm. Kam ardhur për të thënë që kjo nuk është e drejtë.”
Komisionerja për barazi e BE-së, Hadja Lahbib, u bashkua me marshimin, së bashku me dhjetëra eurodeputetë. Në një postim në rrjetin “X”, ajo e quajti këtë marshim “një simbol i fuqisë së shoqërisë civile”.
Eurodeputetja finlandeze Li Andersson deklaroi: “Kjo nuk është vetëm një paradë krenarie. Është një betejë për të drejtat themelore të çdo qytetari. Orban përdor pretekstin e ‘vlerave familjare’ për të shtypur liritë.” /BBC
Lini një Përgjigje