FLASH
Shkruar nga Pamfleti
Bisedimet mes delegacioneve të Ukrainës dhe Shteteve të Bashkuara në Berlin kanë përfunduar pak minuta më parë.
Këtë e bëri të ditur zyra e presidentit ukrainas Volodymyr Zelensky, cituar nga mediat ndërkombëtare.
Ndërkohë axhenda e takimeve nuk përfundon me bisedimet në Kancelarinë Federale Gjermane.
Negociatorët amerikanë Steve Witkoff dhe Jared Kushner janë ftuar në darkën e mbrëmjes në Berlin me liderët evropianë dhe presidentin ukrainas Volodymyr Zelensky.
Këtë e konfirmoi zëdhënësi i qeverisë gjermane. Në Berlin, si mysafirë të kancelarit Friedrich Merz, priten liderët e Francës, Mbretërisë së Bashkuar, Italisë, Danimarkës, Finlandës, Polonisë, Norvegjisë, Holandës dhe Suedisë, si dhe presidentët e Komisionit dhe Këshillit Evropian dhe sekretari i përgjithshëm i NATO-s.
Mësohet se gjatë raundit të fundit të negociatave në Berlin, negociatorët amerikanë i kanë kërkuar Ukrainës të heqë dorë nga pjesa e rajonit të Donbasit që ende kontrollohet nga Kievi. Këtë ia ka bërë të ditur AFP-së një zyrtar i lartë i njohur me diskutimet.
“Putini dëshiron territore. Amerikanët thonë se Ukraina ‘duhet të tërhiqet’, gjë që Kievi e refuzon,” tha burimi për AFP-në. “Është mjaft befasuese që amerikanët po adoptojnë qëndrimin e rusëve për këtë çështje,” shtoi ai.
Lini një Përgjigje