FLASH
Shkruar nga Pamfleti
Ndërsa në Tiranë prej 5 ditësh ka nisur procesi i rinumërimit të votave, në Partinë Demokratike vijojnë përplasjet. Së fundmi kanë rrjedhur mesazhet në grupin e whats’app të kandidatëve për deputet në zgjedhjet e 11 majit.
Besim Kuka, një nga kandidatët e listës së hapur, shkruan në këtë grup se është njoftuar nga Jorida Tabaku se gjatë rinumërimit votat e tij i kanë kaluar Akil Krajës, një tjetër emri të listës së hapur, i cili mban pozicionin e shefit të kabinetit të kreut të PD-së, Sali Berisha.
“Po bëjnë rifalsifikim ose po bëjnë gabime në numërim. Jorida po bën një mesazh ku thotë: “Në QV nr. 1670 në njësinë Zall-Bastar, në procesverbal ishin 18 vota për kandidatin Besim Kuka dhe këta të rinumërimit ia hoqën dhe ia vendosën kandidatit Akil Kraja. Unë kam respekt për Akilin, por votat e mia s’kanë pse t’i kalojnë atij! Nuk është se na hyjnë në punë, por kjo është padrejtësi. Nuk dimë çfarë është bërë në QV-të tjera!”, shkruan në grupin whats’app Kuka.
Por duket se përmendja e emrit të Tabakut, e cila rezulton më e votuara nga lista e hapur e PD-së për Qarkun e Tiranës, duke marrë edhe mandatin në 11 maj, ka irrituar Adriana Kalanë, një tjetër kandidate në listën e hapur të kësaj partie në Tiranë.
“Kush është Jorida”, shkruan Kalaja, ndërsa Kuka i përgjigjet “Adriana, të përshëndes! Jorida më dërgoi SMS dhe thoshte që kishte vënë re një gabim në një QV për mua. Kaq ishte”.
“E kuptova atë unë, por nuk e kuptova për kë person bëhej fjalë. A ishte për të njëjtin person që para fushatës na quante vrasës e gjatë fushatës llum? Këtë desha të sqaroja. Pastaj ne kemi fjalën e bukur shqipe Sude”, i përgjigjet Kalaja.
Kjo e fundit prej kohësh ka një ‘luftë’ të hapur me Jorida Tabakun, ndërsa janë ngritur dyshime se pas kandidates së PD-së, e cila njëherazi drejton edhe atë që njihet si Gjykata e kësaj force politike, qëndron vetë kreu demokrat, Sali Berisha që dirigjon sulmet. Për Tabakun, Kalaja ngriti pretendime se ka marrë vota e ndihmuar nga regjimi, sikundër cilëson ajo Edi Ramën.
Lini një Përgjigje