FLASH
Shkruar nga Pamfleti
Zgjedhjet e 11 Majit janë duke u ndjekur me interes nga partnerët ndërkombëtar të vendit tonë.
Gjatë javëve të shkuara interesi i ndërkombëtarëve për parlamentaret e 11 Majit është parë nga takimet e zhvilluara në Ambasadën e Britanisë së Madhe e më pas atë Gjermane me kreun e SPAK, Prokurorin e Përgjithshëm dhe kreun e KQZ.
Një diplomat perëndimor i përgjigjet disa pyetje të lidhura me këtë proces zgjedhor të polarizuar siç u shpreh një ditë më parë misioni i vëzhgimit të OSBE-ODIHR.
Nicholas Abbott Ambasador i Mbretërisë së Bashkuar në Tiranë ka folur për “TCH” lidhur me procesin e deritanishëm elektoral, i cili theksoi se risi e këtyre zgjedhjeve është përfshirja e SPAK përmes një strategjie parandalimi dhe hetimi të krimeve të mundshme zgjedhore. Ai tha gjithashtu se mbështet institucionet e drejtësisë në luftën ndaj krimeve zgjedhore.
Intervista:
Ambasador Abbott, do të doja të filloja duke ju pyetur: po afrohemi në fund të fushatës elektorale. Nga takimet që keni zhvilluar me kreun e SPAK, Prokurorin e Përgjithshëm dhe kryetarin e Komisionit Qendror të Zgjedhjeve, a keni identifikuar ndonjë shqetësim?
Si fillim, faleminderit për ftesën në këtë intervistë. Kjo është padyshim një periudhë e rëndësishme për Shqipërinë për shkak të zgjedhjeve që po afrojnë.
Mendoj se puna që po bëjnë këto tre institucione është shumë e rëndësishme. Ne kemi ofruar mbështetje, ashtu si edhe shumë anëtarë të komunitetit ndërkombëtar, dhe është e qartë që ka disa problematika që shoqërojnë zgjedhjet — por kjo ndodh kudo, edhe në Mbretërinë e Bashkuar. Ky është një moment i rëndësishëm për çdo demokraci.
Prandaj është inkurajuese të shohësh këto institucione që bashkëpunojnë dhe njihen për aftësinë për të përmbushur detyrat e tyre me përkushtim.
Ambasador, mund të evidentojmë ndonjë problem?
Po mendoj se kjo është një fushatë zgjedhore, siç e keni parë, ka diskutime rreth blerjes së votës, intimidimit të votuesve, dezinformimit.
Por më gëzon fakti që autoritetet dhe institucionet përkatëse po i adresojnë këto çështje.
A mendoni se strategjia e SPAK kundër krimeve zgjedhore po funksionon?
Mendoj se çdo përfshirje e institucioneve të drejtësisë për të siguruar mbikëqyrje të duhur të procesit zgjedhor është një hap i rëndësishëm. Nuk duhet të supozojmë se gjithçka shkon gjithmonë siç dëshirohet. Por unë shoh një angazhim të vërtetë nga institucionet dhe autoritetet shqiptare për të bërë ndryshime.
Këto zgjedhje janë me rëndësi. Shqipëria është në një proces të rëndësishëm për anëtarësim në Bashkimin Evropian. Ka shumë vëmendje ndërkombëtare ndaj asaj që ndodh në Shqipëri. Siç e dini, këtu është një mision vëzhgimi nga OSBE/ODIHR.
Ne kemi kontribuar gjithashtu si Mbretëri e Bashkuar dhe mendoj që është shumë e rëndësishme që këto zgjedhje të shkojnë sa më mirë që të jetë e mundur.
Lini një Përgjigje