FLASH
Shkruar nga Pamfleti
Lexues të “Pamfleti” ju ftojmë të ndiqni edicionin informativ të mesditës, ku mes të tjerash veçojmë:
Korrupsion, pastrim parash e fshehje pasurie
Kur do të mbahet seanca e parë e gjykimit për Metën dhe Kryemadhin.
Është përcaktuar data për nisjen e gjykimit ndaj ish-presidentit Ilir Meta, ish-deputetes Monika Kryemadhi dhe tre personave të tjerë të pandehur.
Gjykata e Posaçme ka caktuar që seanca e parë të zhvillohet më 27 prill, në orën 11:00.
Sipas SPAK, të pandehurit përballen me akuza për korrupsion, pastrim parash dhe mosdeklarim të pasurisë.
Gjatë seancës paraprake, ata i kanë mohuar akuzat, duke pretenduar se hetimi ndaj tyre ka motive politike.
Trupa gjykuese e përbërë nga Etleva Deda, Atalanta Zeqiraj dhe Besmir Stroka ka vendosur këtë datë për zhvillimin e seancës së parë të themelit ndaj ish-presidentit.
Gjatë zhvillimit të seancës paraprake, ata i mohuan akuzat dhe pretenduan se hetimi ndaj tyre është politik.
Kujtojmë se Meta akuzohet për tre vepra penale, të cilat iu komunikuan më 4 gusht 2025, sa i përket dosjes CEZ/DIA dhe lobimit në SHBA. Ai akuzohet për fshehje pasurie, pastrim parash dhe korrupsion.
Ish-presidenti ndodhet në paraburgim që prej tetorit të vitit 2024, ndërsa Kryemadhi është nën masën e detyrimit për paraqitje.
Për çfarë po përgatitet Rama?
Të gjithë deputetët në ‘fushatë’, zbardhen porositë në mbledhje grupi
Edi Rama duket se e ka lënë pas dore qeverinë dhe muajt e fundit e gjithë vëmendja është përqendruar te partia. Ka pasur disa mbledhje të zgjeruara të grupit, u mbajt Asambleja Kombëtare, është mbledhur disa herë Kryesia, teksa kanë nisur dhe takimet degë më degë.
Edhe sot, në Kryesinë e Kuvendit ku mbajt mbledhja e grupit parlamentar socialist, është folur gjatë mbi riorganizimin e partisë. Sipas informacioneve të "Pamfletit", Edi Rama ka kërkuar që të gjithë deputetët të dalin në terren dhe të takojnë sa më shumë socialistë. Po ashtu u është kërkuar të rritet anëtarësia dhe të dëgjohen hallet e qytetarëve. Pra janë të njëjtat porosi që Rama jepte në prag fushate.
PS momentalisht ka nisur një proces riorganizimi, por zgjedhjet vendore janë një vit larg, ndërsa zgjedhjet parlamentare u mbajtën vjet. Pse Rama është fokusuar kaq shumë te partia?
Lëvizjet vijnë në një kohë kur zërat kritikë në PS kanë nisur të riaktivizohen. Prej kohësh është folur se në PS ka shumë pakënaqësi dhe Erion Braçe me Elisa Spiropalin kanë filluar të flasin. Nga ana tjetër pakënaqësia në bazë është rritur ndjeshëm. Ka shumë socialistë të pakënaqur sidomos me punësimet, pasi Rama po fut në punë njerëz të PD-së. Sondazhet tregojnë rritje të pakënaqësisë dhe ka dyshime se Rama po tenton të mbajë pas vetes elektoratin rozë.
Paranojat agresive të Edi Ramës
Dyshon se Elisa i ka bërë ‘puç’ me Albin Kurtin
Metamorfoza mentale e autoritarizmit të Edi Ramës, sa vjen e po rëndohet drejt një paranoje reaktive.
Rasti i fundit me “Mamicën” e tij tregon pikërisht këtë devijim të pakthyeshëm drejt një pike ekstreme.
Siç mësohet, përveç dyshimit se ministrja e tij e Jashtme kishte folur keq në kancelaritë perëndimore për të, posaçërisht në Uashington, ka parë si fantazma edhe një komplot të Elisa Spiropalit me Albin Kurtin.
Duket si shkak për këtë është bërë një vizitë në Prishtinë e shefes së diplomacisë, një ditë para shkarkimit nga qeveria.
Vizitë që siç duket Spiropali e kishte aranxhuar me shpejtësi, me ndërhyrjen e ambasadorit të Kosovës në Tiranë.
Edi Rama është njoftuar menjëherë nga miku i tij ambasador i Shqipërisë në Prishtinë dhe i është vërsulur ministres së jashtme, duke e akuzuar se po vijon të veprojë prapa krahëve të tij, si dhe herët e tjera.
Më pas ka ndodhur shkarkimi, deri tek përplasja fatale, e cila shprehet sa herë ka një zhvillim politik brenda PS-së.
Nga ana tjetër, mësohet se Edi Rama i ka kërkuar në mënyrë ultimative Taulant Ballës që grupi socialist të mbajë një qëndrim politik pas mungesës së Spiropalit në votimin për kërkesën e SPAK ndaj Belinda Ballukut.
Votim, ku mungoi edhe Fatmir Xhafaj, i cili gjithashtu pas asaj ngjarjeje nuk është vënë re as në mbledhjet e grupit, por as në zonën e re elektorale që i ka caktuar kryeministri për të patronazhuar, njësinë numër 5.
I skeduar nga Serious Fraud Office
Partneri i Aktor Group në Bilisht punon për oligarkun serb
Më 18 Mars 2026, "Aktor Group", kompania greke e listuar në Bursën e Athinës me kapitalizim tregu 2.14 miliardë euro, njoftoi investitorët se kishte nënshkruar një marrëveshje kuadër me "BNI Foundation" për eksplorim, zhvillim dhe shfrytëzim të burimeve minerale në Shqipëri. Projekti, i përqendruar në depozitat e nikelit dhe kobaltit në Bilisht, premtonte investime deri në 1 miliardë euro. Aksionet e "Aktor" u tregtuan atë ditë ndërsa investitorët e lexonin njoftimin dhe vlerësonin ndikimin e tij në portofolin e kompanisë.
Por njoftimi i "Aktor" nuk u tregonte aksionerëve atë çfarë Pamfleti ka dokumentuar: se partneri i tyre 49% në sipërmarrjen e re, BNI Foundation, nuk është fond amerikan, nuk ka identitet të verifikueshëm, dhe se kompania përmes së cilës u nënshkrua marrëveshja, Brightnest sh.p.k, ka kapital 1 euro dhe zotërohet nga Mirsad Uruçi, administratori i degës shqiptare të EFT Group, kompanisë së oligarkut serb Vuk Hamoviç, i dokumentuar në dosjen Suisse Secrets të OCCRP-së me tre llogari në Credit Suisse.
A e dinte Alexandros Exarchou, kryetari i bordit dhe CEO i "Aktor", se me kë po nënshkruante?
Nëse po, pse nuk ua tregoi investitorëve?
Nëse jo, çfarë hetimi bëri para se të njoftonte tregun?
Për më shumë, klikoni linkun e lajmeve të orës 12.00
Lini një Përgjigje