FLASH
Shkruar nga Pamfleti
Një tërmet i fortë është regjistruar në orët e para të së dielës në territorin grek, pranë kufirit me Shqipërinë.
Epiqendra e tërmetit me magnitudë 5.3 të shkallës Rihter, me thellësi fokale 5 km, ndodhet 10 kilometra në veriperëndim të AVAG-ut të Leptokaryas, Thesproti, pranë kufirit me Shqipërinë.
Tërmeti është regjistruar rreth orës 05:32, sipas orës lokale greke.
Sizmologu Efthymis Lekkas, duke folur për transmetuesin publik grek ERT, tha se tërmeti kishte thellësi të vogël fokale, ndërsa shtoi se pasgoditjet e regjistruara me magnitudë 4.7 dhe 3.4 Rihter janë një zhvillim pozitiv për evoluimin e fenomenit sizmik.
Ai paralajmëroi se ndërtesat që kanë pësuar edhe dëme të vogla nuk duhet të përdoren para se të kontrollohen nga ekspertët.
Zëvendëskryetari për Mbrojtjen Civile në Bashkinë e Janinës, Efthymios Chrysostomou, deklaroi për ERTnews se shumë banorë dolën jashtë shtëpive të frikësuar. Sipas tij, siç ndodh shpesh me tërmete mbi 5 ballë, në disa zona pati edhe ndërprerje të energjisë elektrike.
Guvernatori i rajonit të Epirit, duke folur për televizionin Action24, njoftoi se pas tërmetit ndodhi një rrëshqitje dheu në autostradën Egnatia, në segmentin mes Janinës dhe Igumenicës, në kufirin mes bashkive Zitsa dhe Filiates.
Autoritetet theksuan se zonat pranë epiqendrës nuk janë të dendura me popullsi, çka ndihmoi që të mos rrezikohen jetë njerëzish. Janë vërejtur disa çarje në shtëpi të vjetra dhe në disa kisha, në fshatra si Dodona dhe Driskos, por pa probleme serioze strukturore.
Sipas sizmologëve, aktiviteti pasgoditës mbetet i fortë, pasi janë regjistruar gati dhjetë lëkundje pas tërmetit kryesor. Më e forta prej tyre arriti magnitudën 4.7 Rihter, ndërsa të tjerat ishin më të dobëta, kryesisht nën 3 Rihter.
Autoritetet dhe shërbimet e Mbrojtjes Civile mbeten në gatishmëri të plotë, ndërsa ekspertët po monitorojnë zhvillimin e situatës dhe vlerësojnë se lëkundja mund të ketë qenë tërmeti kryesor i kësaj serie sizmike.
Lini një Përgjigje