FLASH
Shkruar nga Pamfleti
Sekretari i Përgjithshëm i Kombeve të Bashkuara, Antonio Guterres, ka paralajmëruar se përçarja në Ngushticën e Hormuzit po shkakton një goditje të rëndë për ekonominë botërore duke e mbytur atë gradualisht.
Në një deklaratë për shtyp, Guterres tha se kriza në Lindjen e Mesme ka hyrë në muajin e tretë dhe pasojat po përkeqësohen me çdo orë që kalon, pavarësisht një armëpushimi të brishtë. Ai shprehu shqetësim të thellë për kufizimin e të drejtave të lundrimit në zonën e Ngushticës së Hormuzit, duke theksuar se kjo po pengon furnizimin me naftë, gaz, plehra dhe mallra të tjera kritike, ndërsa po ndërpret tregjet e energjisë, transportit, prodhimit dhe ushqimit.
"Kriza në Lindjen e Mesme po hyn ngadalë në muajin e tretë. Pavarësisht një armëpushimi të brishtë, pasojat përkeqësohen në mënyrë dramatike me çdo orë që kalon. Jam thellësisht i shqetësuar për kufizimin e të drejtave dhe lirive të lundrimit në zonën e Ngushticës së Hormuzit. Pengimin e furnizimit me naftë, gaz, plehra dhe mallra të tjera kritike. Ndërprerjen e tregjeve të energjisë, transportit, prodhimit dhe ushqimit", tha ai.
Guterres përshkroi tre skenarë të mundshëm. Nëse rruga ujore rihapet menjëherë, zinxhirët e furnizimit do të kenë nevojë për muaj të tërë që të rikuperohen, gjë që do të shkaktojë rënie të rritjes ekonomike globale dhe rritje të inflacionit.
Nëse përçarja zgjat deri në mes të vitit, goditja ndaj rritjes ekonomike do të jetë më se dyfish më e rëndë dhe rreth 32 milionë njerëz mund të shtyhen në varfëri për shkak të rritjes së çmimeve. Ndërsa nëse situata vazhdon deri në fund të vitit, inflacioni do të rritet në mënyrë marramendëse, rritja ekonomike do të bjerë ndjeshëm dhe vuajtje të mëdha do të mbizotërojnë, sidomos tek popullatat më të cenueshme në botë.
Shefi i OKB-së bëri thirrje urgjente për rihapjen e menjëhershme të Ngushticës së Hormuzit, duke u bërë thirrje palëve të lejojnë kalimin e lirë të anijeve pa pengesa.
Ngushtica e Hormuzit konsiderohet si një nga arteriet më jetike të tregtisë botërore, pasi përmes saj kalon një pjesë e madhe e naftës dhe gazit që furnizon ekonomitë e Azisë, Evropës dhe më gjerë.
Lini një Përgjigje