FLASH
Shkruar nga Pamfleti
Policia malazeze ka ndërmarrë një operacion të gjerë ndaj personave që kanë mbështetur rusët në luftën ndaj Ukrainës, duke u bashkuar si pjesë e formacioneve të huaja në mbështetje të Vladimir Putin.
Operacioni i pagëzuar me emrin "Lugansk" synonte të vërtetonte pjesëmarrjen e personave në formacione të armatosura të huaja, në kundërshtim me ligjin dhe rregullat e së drejtës ndërkombëtare.
Në këtë operacion u arrestuan Danko Saviç dhe Dejan Braletiç, përkatësisht 61 dhe 54 vjeç.
Kontrolle u kryen edhe në shtëpitë e Jovan Buriçit, Gjorgji Vukmirit, Borislav Jovoviçit, Zharko Jovanoviçit, Goran Kovaçeviçit, Branko Grujiçiçit, Mladen Ajkuniçit dhe Danka Vukçeviçit.
Kjo u njoftua nga Drejtoria e Policisë, duke deklaruar se deri më tani janë përfshirë 12 persona dhe se gjatë ditës dhe natës së djeshme, janë kryer kontrolle në 13 lokacione, 12 ndërtesa banimi dhe ndihmëse dhe një firmë avokatie, në zonën e tre qyteteve: Danilovgrad, Nikshiq dhe Podgoricë:
"Gjatë kontrolleve u gjetën dhe u sekuestruan: 24 armë zjarri, mbi 1,000 fishekë, disa korniza, nëntë thika, shpata dhe bajoneta, si dhe uniforma, flamuj dhe shenja të tjera dalluese të organizatave dhe grupeve formuese, si dhe sende të tjera që mund të sekuestrohen sipas ligjit, në lidhje me këto dhe vepra penale të lidhura me to”, njoftoi Policia malazeze.
Provat materiale të mbledhura tregojnë se persona të caktuar në kundërshtim me ligjin dhe rregullat e së drejtës ndërkombëtare, kanë marrë pjesë në një formacion të armatosur të huaj të Federatës Ruse, përfshirë në Lugansk, në luftën që Rusia po zhvillon kundër Ukrainës në territorin ukrainas, në periudhën nga fillimi i vitit 2023 deri në fillim të vitit 2025.
Vetëm në një rast, bazuar në pjesëmarrjen në një luftë të huaj dhe në lidhje me kryerjen e kësaj vepre penale, kanë fituar dhe poseduar në mënyrë të paligjshme shuma të mëdha parash, nga të cilat 1,500,000 euro (një milion e pesëqind mijë euro) ishin në llogarinë rrjedhëse të këtij personi.
Ata shpjegojnë se gjatë një kontrolli të ambienteve të banimit dhe ambienteve të tjera të përdorura nga Saviç, policia gjeti dhe konfiskoi: një pushkë ajrore pa dokumentacionin e nevojshëm, disa pjesë të uniformës ushtarake, jelekë mbrojtës, helmeta, uniforma të Vëllazërisë Kozake, pajisje komunikimi, karta SIM, karta anëtarësimi, një numër të madh faturash dhe fletëpagesash, certifikata shtetësie dhe pasaportash të vendeve të huaja, një broshurë për pjesëmarrje në front, provë të pronësisë së pasurive të patundshme me vlerë, si dhe objekte dhe gjëra të tjera.
Lini një Përgjigje