FLASH
Shkruar nga Pamfleti
Zbulohen detajet e doktrinës së re britanike të mbrojtjes...
Pasditen e sotme do të publikohet doktrina e re britanike e mbrojtjes, e cila përditësohet çdo 10 vjet: një dokument prej 140 faqesh, rekomandimet e të cilit janë pranuar tashmë në tërësi nga qeveria laburiste e Keir Starmer.
Udhëzimi kryesor është që Britania e Madhe të bëhet “gati për një luftë” në Evropë ose në Atlantik, përballë një kërcënimi rus të cilësuar si “i menjëhershëm dhe shqetësues”. Me këtë synim, Londra do të pajiset me një flotë të re nëndetësesh sulmuese me energji atomike, deri në 12 njësi që do të jenë gati deri në fund të kësaj dekade. Gjithashtu, do të investohen 15 miliardë paund (rreth 18 miliardë euro) për modernizimin e forcës bërthamore frenuese dhe po shqyrtohet mundësia e blerjes së bombarduesve strategjikë të aftë për të lëshuar koka bërthamore (deri tani arsenali bërthamor britanik është i shpërndarë në 4 nëndetëse Trident, që lundrojnë vazhdimisht).
Ministri i Mbrojtjes, John Healey, e ka thënë qartë se Britania duhet të jetë gati të përballet me një sulm ushtarak nga Rusia dhe se doktrina e re e mbrojtjes është “një mesazh për Moskën” që Londra ka ndërmend të luftojë. Kjo përbën një revolucion të plotë në qëndrimin ushtarak britanik, i cili deri më tani ka qenë i fokusuar tek trupat ekspedicionare të shpejta për të përballuar konflikte jashtë vendit me kundërshtarë me teknologji të ulët (si në luftërat në Irak dhe Afganistan): tani përballemi me një sfidë të ndërlikuar në të gjitha frontet, përfshirë edhe aspektin e luftës elektronike.
Ndër masat e tjera përfshihet krijimi i një Garde Kombëtare, një forcë territoriale e përbërë nga qytetarë të angazhuar për mbrojtjen e infrastrukturave strategjike, nga aeroportet deri te linjat e komunikimit. Do të synohet gjithashtu të ndalet rënia e numrit të trupave të Forcave të Armatosura, që është zvogëluar ndjeshëm gjatë dekadave të fundit.
Mbetet një pikëpyetje e madhe mbi mënyrën se si do të financohet kjo gjithçka: qeveria Starmer është zotuar tashmë të rrisë shpenzimet për Mbrojtjen në 2.5% të PBB-së brenda dy vitesh (nga 2.3%), duke përgjysmuar për këtë qëllim fondet për bashkëpunimin ndërkombëtar. Por doktrina e re e mbrojtjes kërkon që shpenzimet të rriten të paktën në 3% të PBB-së, një objektiv që është përmendur nga ministrat por që ndesh në kujdesin e Thesarit, i cili ka paralajmëruar për vështirësitë që lidhen me një përpjekje të tillë. /Corriere Della Sera
Lini një Përgjigje