FLASH
Shkruar nga Pamfleti
Rusia dyshohet se ka zhvilluar për rreth një vit e gjysmë një operacion të gjerë spiunazhi ndaj vendeve europiane, duke përdorur qindra dronë të lëshuar nga anije të së ashtuquajturës "flotë fantazmë", të cilat lundronin në Kanalin Anglez, Detin e Veriut dhe Detin Baltik.
Konkluzioni vjen nga një raport i Institutit Ndërkombëtar për Çështjet Strategjike (IISS) në Londër, i cituar nga The Guardian, sipas të cilit operacioni u zhvillua pothuajse pa u penguar, duke nxjerrë në pah mangësitë e sistemeve të mbrojtjes ajrore të NATO-s përballë kërcënimeve që paraqesin dronët e vegjël dhe me kosto të ulët.
Raporti identifikon si objektiva të operacionit Mbretërinë e Bashkuar, Francën, Gjermaninë, Belgjikën, Holandën, Suedinë dhe disa vende të tjera anëtare të Aleancës.
"Ka shumë gjasa që kjo të ketë qenë një fushatë e planifikuar dhe e koordinuar nga Kremlini", deklaroi Charlie Edward, studiuesi që udhëhoqi hartimin e raportit.
Sipas tij, më shumë se 12 shtete europiane janë prekur nga ky aktivitet, i cili konsiderohet një fitore taktike për Moskën dhe një dështim strategjik për NATO-n. Raporti argumenton se sistemet aktuale të mbrojtjes janë ndërtuar kryesisht për t'u përballur me avionë dhe raketa, jo me dronë të vegjël që fluturojnë në lartësi të ulët.
Autorët e studimit thonë se operacioni kishte disa objektiva, mes tyre mbikëqyrjen e centraleve bërthamore, mbledhjen e të dhënave mbi bazat ushtarake, zbulimin e infrastrukturës kritike dhe ushtrimin e presionit psikologjik ndaj vendeve perëndimore.
Sipas hetimit, dronët ngriheshin nga anije të ndryshme të "flotës fantazmë" ruse, përfshirë cisterna nafte, anije tregtare dhe mjete të tjera private, të cilat lundronin pranë brigjeve të Europës veriperëndimore.
Në raport thuhet se janë regjistruar mbi 140 fluturime dronësh pranë centraleve bërthamore dhe objekteve ushtarake në vendet e përfshira, pa u ndërmarrë masa për neutralizimin e tyre.
Mes rasteve të dokumentuara përmenden fluturimet mbi bazat ajrore britanike Lakenheath dhe Fairford, bazën detare franceze të Île Longue, ku ndodhen nëndetëse me armë bërthamore, bazat Kleine-Brogel në Belgjikë dhe Volkel në Holandë, ku ruhen armë bërthamore amerikane, si edhe një bazë nëndetësesh në veri të Gjermanisë.
Një tjetër incident u regjistrua në shtator 2025, kur aeroporti i Kopenhagës u mbyll përkohësisht pas raportimeve për dronë në zonë. Gjatë së njëjtës periudhë, katër cisterna të lidhura me "flotën fantazmë", të regjistruara nën flamuj të vendeve të tjera, por të identifikuara si pronësi ruse, po lundronin pranë brigjeve daneze. Më vonë, ato u sekuestruan nga forcat speciale franceze.
Raporti vëren se kulmi i aktivitetit u regjistrua mes shtatorit dhe nëntorit të vitit të kaluar, kur pranë objekteve ushtarake dhe infrastrukturës civile në Europë identifikoheshin mesatarisht rreth 30 dronë të dyshimtë çdo muaj.
Sipas autorëve, incidentet janë ulur ndjeshëm në muajt e fundit, pasi marina britanike dhe forcat detare të vendeve të tjera europiane kanë shtuar operacionet kundër anijeve që dyshohet se janë pjesë e "flotës fantazmë" ruse.
Lini një Përgjigje