FLASH
Shkruar nga Pamfleti
Objekti i projektuar për t’i mbijetuar katastrofave do të mbledhë dhe ruajë të dhëna mbi ndryshimet klimatike dhe reagimin e njerëzimit për dekada, madje edhe pas zhdukjes së tij të mundshme...
Një strukturë e pazakontë e quajtur “Earth’s Black Box” (Kutia e Zezë e Tokës) do të ndërtohet në një aeroport të largët në Tasmani, Australi, me qëllimin për të dokumentuar zhvillimet që lidhen me ndryshimet klimatike dhe ndikimin e tyre në njerëzim.
Projekti është frymëzuar nga kutitë e zeza të avionëve, të cilat ruajnë të dhëna të rëndësishme pas aksidenteve ajrore. Në mënyrë të ngjashme, “Earth’s Black Box” do të regjistrojë vazhdimisht të dhëna mbi gjendjen e planetit dhe veprimet e njerëzimit.
Sistemi i mbrojtur i ruajtjes së informacionit do të mbledhë të dhëna nga agjenci hapësinore, stacione meteorologjike dhe universitete, me synimin për të krijuar një regjistrim sa më objektiv të zhvillimeve globale. Pasi të përfundojë, struktura do të jetë 16 metra e gjatë dhe 4 metra e lartë, e ndërtuar për t’i rezistuar fatkeqësive natyrore si ciklonet, tërmetet, zjarret, përmbytjet, por edhe sulmeve të mundshme.
Sipas ekipit të Rouser Lab, që drejton projektin, objekti do të ndërtohet mbi një formacion graniti 500 milionë vjeçar në bregun perëndimor të Tasmanisë, një zonë që konsiderohet ndër më të qëndrueshmet politikisht dhe gjeologjikisht në botë.
Kutia e Zezë do të furnizohet me energji përmes 36 paneleve diellore të mbrojtura me xham dhe një sistemi termoelektrik, duke synuar të vazhdojë funksionimin edhe shumë kohë pas zhdukjes së mundshme të njerëzimit.
Projekti u prezantua për herë të parë në vitin 2021, gjatë Konferencës së OKB-së për Klimën (COP26) në Glasgow. Në atë kohë, të dhënat e konferencës u ruajtën në disqe dixhitale me synimin që të transferoheshin më vonë në strukturën përfundimtare.
Megjithëse për disa vite projekti dukej i pezulluar, Rouser Lab konfirmoi se punimet e ndërtimit tashmë kanë nisur. Sipas kompanisë, instalimi i objektit pranë qytetit Queenstown në Tasmani pritet të përfundojë deri në dhjetor të këtij viti.
Drejtori i projektit, Jonathan Kneebone, deklaroi për gazetën The Guardian se gjatë pesë viteve të fundit ekipi ka përmirësuar projektimin, sistemet e ruajtjes së të dhënave, burimet e materialeve, platformën dixhitale dhe modelet e financimit për mbështetjen afatgjatë të iniciativës.
Pasi të vihet në funksion, “Earth’s Black Box” do të regjistrojë një gamë të gjerë treguesish që lidhen me ndryshimet klimatike, përfshirë temperaturat globale, nivelin e deteve, përqendrimin e dioksidit të karbonit në atmosferë, si dhe të dhëna mbi konsumin e energjisë dhe tregues të tjerë shoqërorë.
Për të ofruar një pasqyrë më të plotë të zhvillimeve, sistemi do të ruajë gjithashtu fjalime publike, artikuj mediatikë, studime akademike dhe publikime në rrjetet sociale që lidhen me klimën.
Sipas krijuesve të projektit, qëllimi është të krijohet një regjistrim objektiv i ngjarjeve që mund të çojnë në një krizë globale, duke u shërbyer brezave të ardhshëm si burim informacioni dhe reflektimi.
Megjithatë, mbetet ende e paqartë se si do të mund të aksesohen të dhënat në rast të një katastrofe globale dhe nëse do të ketë njerëz që do të mund t’i përdorin ato.
Njoftimi për nisjen e ndërtimit i dha fund spekulimeve se projekti ishte thjesht një fushatë marketingu. Ndërsa Universiteti i Tasmanisë ishte i lidhur fillimisht me iniciativën, ai u tërhoq në vitet pasuese dhe kërkoi heqjen e emrit të tij nga faqja zyrtare e projektit. Aktualisht, iniciativa mbështetet nga një rrjet kompanish kreative, agjencish komunikimi dhe arkitektësh.
Rouser Lab po punon gjithashtu për një projekt tjetër ambicioz: ndërtimin e një “tekno-obelisku” që do të transmetojë vazhdimisht një sinjal radiofonik SOS drejt hapësirës.
Sot projekti koordinohet nga Earth’s Black Box Foundation, një organizatë bamirëse e regjistruar që ka marrë përsipër realizimin dhe mirëmbajtjen afatgjatë të tij. Pas përfundimit të ndërtimit, fondacioni do të ngarkojë në sistem të gjitha të dhënat klimatike të mbledhura deri tani dhe do të nisë regjistrimin e vazhdueshëm.
Kryetari i Këshillit të Bregut Perëndimor të Tasmanisë, Shane Pitt, tha se projekti ka qenë në përgatitje prej shumë vitesh dhe shtoi se ai mund të shndërrohet edhe në një atraksion turistik për rajonin.
Lini një Përgjigje