FLASH
Shkruar nga Pamfleti
Një ekip ndërkombëtar studiuesish ka marrë autorizimin e autoriteteve turke për të nisur gërmime në formacionin gjeologjik Durupinar, në lindje të Turqisë, ku disa kërkues besojnë se mund të gjenden mbetjet e Arkës së Noes.
Grupi Noah’s Ark Scans, i përbërë nga studiues, gjeofizikanë dhe arkeologë nga Turqia dhe vende të tjera, do të përdorë metoda të avancuara gjeofizike jo-shkatërruese për të analizuar strukturën 164 metra të gjatë, e cila ndodhet rreth 30 kilometra në jug të malit Ararat. Qëllimi është identifikimi dhe hartëzimi i anomalive nëntokësore.
Anëtarët e ekipit shpresojnë se kërkimet do të sjellin prova të reja për të mbështetur teorinë se struktura mund të lidhet me Arkën e përshkruar në Bibël.
Sipas studiuesve, përmasat e formacionit përputhen në mënyrë të konsiderueshme me dimensionet e Arkës së Noes të përshkruara në Librin e Zanafillës. Në tekstet biblike, Arka përshkruhet me gjatësi rreth 156 metra, gjerësi 26 metra dhe lartësi 15 metra.
Formacioni Durupinar tërhoqi vëmendjen e studiuesve për herë të parë në vitin 1948, kur reshjet e dendura zbuluan një strukturë me formë të ngjashme me anijen. Fotografi ajrore dhe skanime të mëvonshme kanë ushqyer debatin mbi origjinën e saj.
Megjithatë, një pjesë e komunitetit shkencor mbetet skeptike. Kritikët argumentojnë se bëhet fjalë për një formacion natyror shkëmbor, pa lidhje me ndonjë strukturë të ndërtuar nga njeriu.
Nga ana tjetër, drejtuesi i kërkimeve, Andrew Jones, ka deklaruar se disa karakteristika të pazakonta të zbuluara gjatë analizave paraprake sugjerojnë se nën sipërfaqe mund të ekzistojë një strukturë e krijuar nga njeriu.
Lauren Witzke, anëtare e ekipit Noah’s Ark Scans, e cilësoi projektin si një përpjekje që synon të verifikojë një nga rrëfimet më të njohura të traditës biblike.
Gërmimet pritet të nisin më vonë gjatë këtij viti, ndërsa rezultatet e tyre mund të hedhin më shumë dritë mbi një debat që vazhdon prej dekadash.
Lini një Përgjigje