FLASH
Shkruar nga Pamfleti
Rivaliteti historik mes Brazilit dhe Argjentinës ka marrë një tjetër dimension gjatë Kampionatit Botëror, teksa tifozët brazilianë kanë tërhequr vëmendjen me një pankartë gjigante dhe provokuese të shpalosur në Filadelfia.
Mbështetësit e “Seleçaos” janë mbledhur në qytetin amerikan, ku Brazili do të zhvillojë ndeshjen e dytë të fazës së grupeve ndaj Haitit. Atmosfera festive e krijuar nga këngët dhe thirrjet e tifozëve është shoqëruar edhe me një koreografi që ka bërë menjëherë xhiron e rrjeteve sociale.
Në qendër të vëmendjes është vendosur një pankartë satirike ku paraqiten tre prej figurave më të mëdha të historisë së futbollit: Pele, Diego Maradona dhe Lionel Mesi. Në ilustrim, legjenda braziliane Pele shfaqet i ulur në një fron mbretëror, ndërsa dy ikonat argjentinase paraqiten në pozicione nënshtruese ndaj tij.
Sipas imazhit, Lionel Mesi shihet i gjunjëzuar duke i puthur këmbën Pele-së, ndërsa Diego Maradona paraqitet pranë tij duke e freskuar me një gjethe palme, simbol tradicional i figurave mbretërore.
Përmes kësaj pankarte, tifozët brazilianë kanë zgjedhur të përcjellin mesazhin e tyre mbi debatin e vazhdueshëm për lojtarin më të madh në historinë e futbollit. Koreografia është interpretuar si një deklaratë e qartë në favor të Pele-së, duke rindezur diskutimet mes tifozëve të dy vendeve rivale për çështjen e famshme të “GOAT” (Greatest of All Time).
Pankarta ka ngjallur reagime të shumta në rrjetet sociale, ku shumë përdorues e kanë cilësuar si një shfaqje humori dhe rivaliteti sportiv, ndërsa të tjerë e kanë konsideruar një provokim ndaj tifozëve argjentinas.
Lini një Përgjigje