FLASH
Shkruar nga Pamfleti
Kryeministri Edi Rama është pritur me protesta pasi shkoi në Düsseldorf të Gjermanisë.
Në nisje të takimit, një grup protestuesish shqiptarë, me simbole kombëtare dhe thirrje për dorëheqjen e Ramës kanë ngritur zërin kundër veprimeve të kreut të qeverisë shqiptare.
Protestuesit ngritën pankarta dhe shprehën thirrje kundër ligjeve që sipas tyre favorizojnë privatizimin e pasurive publike, si edhe kërkuan vazhdimisht, në simfoni me revoltën në Tiranë, largimin e kryeministrit Rama.
Ky episod është i dyti i këtyre javëve, pasi Rama u prit me protesta nga shqiptarët e diasporës, edhe kur ndodhej në Basel të Zvicrës, ndërkohë që protestat masive në Tiranë kishin nisur.
Rama në Gjermani është takuar këtë të mërkurë, 1 korrik me kryeministrin e landit gjerman Nordrhein-Westfalen, Hendrik Wüst, në kuadër të një vizite zyrtare në Gjermani.
Takimi u fokusua në forcimin e bashkëpunimit mes Shqipërisë dhe një prej rajoneve më të fuqishme ekonomike dhe industriale të Gjermanisë, me theks të veçantë në investimet e huaja, zhvillimin e teknologjisë digjitale, arsimin profesional dhe procesin e anëtarësimit të Shqipërisë në Bashkimin Europian.
Gjatë vizitës në Landin e Renanisë Veriore-Vestfalisë (Nordrhein-Westfalen-NRW), Rama do të marrë pjesë në “Ruhr Summit”, një nga ngjarjet më të rëndësishme në Europë të dedikuara inovacionit, sipërmarrjes dhe teknologjisë.
Lini një Përgjigje