FLASH
Shkruar nga Pamfleti
Vetëm 1 ditë para nisjes së fushatës elektorale për zgjedhjet e 11 majit, OSBE i kujtoi institucioneve të drejtësisë dhe sigurisë rëndësinë të bëjnë detyrën e tyre për hetimin e krimeve zgjedhore.
Në këtë takim ishte i pranishëm kreu i Prezencës së OSBE-së në Shqipëri, ambasadori Michel Tarran. Gjatë fjalës së tij Tarran u shpreh se integriteti zgjedhor qëndron në themel të çdo shoqërie demokratike.
Ai thekson se sigurimi i zgjedhjeve të lira dhe të ndershme kërkon institucione të forta, llogaridhënie, transparencë dhe angazhim të palëkundur ndaj shtetit të së drejtës. Tarran tha se prokurorët, oficerët e policisë gjyqësore dhe përfaqësuesit e Policisë së Shtetit kanë detyrën thelbësore të hetimit, ndjekjes finale dhe luftës kundër krimit zgjedhor.
“Sigurimi i zgjedhjeve të lira dhe të ndershme kërkon institucione të forta, llogaridhënie, transparencë dhe angazhim të palëkundur ndaj shtetit të së drejtës. Prokurorët, oficerët e policisë gjyqësore dhe përfaqësuesit e Policisë së Shtetit kanë detyrën thelbësore të hetimit, ndjekjes finale dhe luftës kundër krimit zgjedhor”, tha Tarran.
Në një aktivitet të organizuar nga OSBE, ambasadori Michel Tarran, nuk la pa cekur problemet që raportet e OSBE-së kanë nxjerr në 2 proceset e fundit zgjedhore.
"Megjithëse është bërë përparim raportet përfundimtare të ODIHR për zgjedhjet parlamentare të vitit 2021 dhe ato vendore të vitit 2023 vënë në dukje se krimi zgjedhor, në veçanti shitblerja e votës, keqpërdorimi i burimeve të administratës dhe frikësimi i votuesve vazhdojnë të jenë çështje shqetësuese. Të dyja raportet rekomandojnë që organet ligjzbatuese të bëjnë çdo përpjekje për të identifikuar dhe hetuar në mënyrë të pavarur të gjitha akuzat për shkelje zgjedhore, përfshirë shitblerjen e votës, presionin ndaj votuesve dhe keqpërdorimin e burimeve të administratës në mënyrë të plotë, të shpejtë dhe transparente”, tha Tarran.
Tarran vlerësoi masat paraprake dhe të bashkërenduara të ndërmarra nga zyra e Prokurorit të Përgjithshëm, Komisionit Qendror të Zgjedhjeve, SPAK-u dhe Policisë së Shtetit për sfidat që lidhen me krimet zgjedhore.
“Veprimet tuaja të përbashkëta dhe individuale pasqyrojnë vullnetin e fortë institucional për të mbrojtur integritetin e zgjedhjeve”, tha ai.
Institucionet e drejtësisë në këto zgjedhje do të jenë të pranishme më afër se kurrë për gjetjen e krimeve zgjedhore.
“Esenciale marrëveshja me Policinë e Shtetit. I rëndësishëm, Protokolli i Prgjithshëm që u arrit me SPAK, KQZ dhe Prokurorisë së Përgjithshme. Kemi vendosur që pranë KQZ do të ketë përfaqësues të SPAK dhe Prokurorisë së Përgjithshme, një oficer i policisë gjyqësore dhe 1 prokuror. Secili të shfaqë gatishmëri për të raportuar krimet zgjedhore”, tha Olsian Çela.
Gjithashtu, Tarran, mirëpriti theksin që i është vënë transparencës dhe informimit në kohë të publikut për hetimet e krimeve zgjedhore.
“Ne vlerësojmë që organizatat e shoqërisë civile dhe media kanë rol të rëndësishëm për realizimin e mbikëqyrjes së pavarur duke plotësuar përpjekjet institucionale për të ekspozuar krimet zgjedhore dhe për ta fuqizuar llogaridhënien.
Në gjuhën shqipe ka një shprehje të vjetër “Gur, gur bëhet kalaja”. Çdo përpjekje kontribuon në një qëllim më të madh. Qëllimi ynë i përbashkët është i qartë të sigurohemi që shkeljet zgjedhore, jo vetëm të identifikohen, por edhe të hetohen dhe ndiqen penalisht pa vonesa dhe në mënyrë të plotë, duke përforcuar kështu besimin e publikut në procesin demokratik”, tha ambasadori i OSBE-së.
KQZ, Prokuroria e Përgjithshme dhe SPAK kanë bashkuar fuqitë në këto zgjedhje për të luftuar krimin elektoral përmes një marrëveshjeje. Ato do të fokusohen në parandalimin dhe hetimin e veprave penale që lidhen me blerjen e votës, keqpërdorimin e administratës publike dhe të infrastrukturës shtetërore, si edhe me përfshirjen e grupeve kriminale në zgjedhje.
Lini një Përgjigje