FLASH
Shkruar nga Diplomatico | Pamfleti.net
Ekspertët paralajmërojnë: Serbia po zhytet në autokraci të kontrolluar nga frika...
Në një nga daljet më të tensionuara të tij publike që nga kriza e dhunshme në veri të Kosovës, presidenti serb Aleksandar Vuçiç hodhi akuza direkte ndaj Prokurorisë për Krim të Organizuar në Serbi, duke e përshkruar si të infiltruar nga interesa të jashtme dhe duke paralajmëruar kallëzime penale ndaj vetë kryeprokurorit. Kjo ngjarje nuk është thjesht një përplasje institucionale; ajo përfaqëson një pikë kthese të rrezikshme për rendin juridik dhe stabilitetin e brendshëm të Serbisë, me pasoja që tejkalojnë kufijtë e saj.
Çfarë po ndodh realisht në Serbi?
Të enjten, Prokuroria për Krim të Organizuar ndaloi dy ish-ministra të rëndësishëm të regjimit: Tomislav Momirović dhe Goran Vesić, si pjesë e një hetimi për abuzim të rëndë me fondet publike në projektin "Nadstrešnica". Arrestimi i tyre ndodhi pas presioneve ndërkombëtare për luftë reale ndaj korrupsionit në Serbi; një kërkesë e përsëritur nga Brukseli si kusht për avancimin e negociatave për anëtarësim.
Në vend që të mbështesë institucionet e drejtësisë, Vuçiç e përdori momentin për të hedhur akuza të egra, duke pretenduar se arrestimet janë urdhëruar nga jashtë, në një “sulm të koordinuar për të dobësuar shtetin”.
Strategjia e Aleksandar Vuçiç: nacionalizëm për të mbrojtur klientelën
Kjo nuk është hera e parë që Vuçiç përdor narrativën e “komplotit perëndimor” për të shmangur goditjen ndaj njerëzve të afërt me pushtetin. Ai ka ndërtuar një sistem ku ligji zbatohet selektivisht dhe ku drejtësia ndëshkon armiqtë e regjimit, por amniston bashkëpunëtorët.
Arrestimi i Momirović dhe Vesić ishte një surprizë. Të dy janë figura kyçe të partisë së tij, dhe ndoshta më shumë se çdo tjetër, dinë për rrjetin ekonomik paralel të Vuçiçit.
Reagimi i menjëhershëm i presidentit, tregon frikë reale se zinxhiri i goditjes mund të shkojë deri te vetë ai.
Deklarata se do të kallëzojë penalisht kryeprokurorin Mladen Nenadić, pa asnjë bazë ligjore, përbën presion direkt politik ndaj një institucioni të pavarur. Avokatë dhe ekspertë juridikë e kanë quajtur këtë një shkelje flagrante të ndarjes së pushteteve, një sinjal se Serbia po rrëshqet drejt autokracisë.
Me këtë akt, Vuçiç dërgon një mesazh të qartë: nuk ka ndarje pushtetesh, ka vetëm një qendër pushteti; ai vetë.
Deklaratat se “Evropianët” urdhërojnë arrestime janë një goditje e drejtpërdrejtë ndaj Bashkimit Evropian, i cili në mënyrë të përsëritur ka kërkuar që Serbia të përmbushë standardet e shtetit të së drejtës. Ky është një devijim i rrezikshëm nga rruga e integrimit, dhe një sinjal për Brukselin se Vuçiç po rikthehet drejt aleancave të vjetra me Lindjen, Rusinë dhe Kinën, për të mbijetuar politikisht.
Ndërkohë, diplomatë perëndimorë kanë filluar të sinjalizojnë se Serbia mund të përballet me ngrirje fondesh, si dhe me izolim diplomatik nëse përshkallëzon më tej këtë kurs.
Vuçiç, alarm për stabilitetin rajonal
Për Shqipërinë dhe shqiptarët në rajon, veprime të tilla përfaqësojnë një alarm të kuq për destabilizimin e mundshëm të Ballkanit. Një Serbi ku drejtësia intimidohet dhe nacionalizmi ushqehet për qëllime të brendshme, është një Serbi e paparashikueshme në raport me Kosovën, Malin e Zi, dhe vetë stabilitetin rajonal.
Ndërsa Kosova përballet me presion për themelimin e Asociacionit, dhe shqiptarët e Luginës janë nën diskriminim sistematik, çdo akt i radikalizuar nga Beogradi forcon frikën për ndërhyrje destabilizuese në rajon./Pamfleti
Lini një Përgjigje