FLASH
Shkruar nga Pamfleti
Ka dështuar për të 34-tën herë konstituimi i Kuvendit të Kosovës.
Pas dështimit të seancës së 34-ta, e cila nuk zgjati as tre minuta është caktuar ajo e radhës. Kryesuesi i seancës, Avni Dehari njoftoi se seanca e 35-të në përpjekje për ta konstituar parlamentin do të zhvillohet të shtunën, më 21 qershor.
“51 deputetë kanë dhënë votën për, 1 ka qenë kundër, abstenim nuk ka. Nuk kemi kuorum, atëherë shihemi më 21.06.25 në ora 10:30”, tha Dehari.
Përveç betimit të deputetëve të zgjedhur, Kuvendi i ri ka mbetur i pa konstituar në mungesë të zgjedhjes së kryetarit të ri dhe nënkryetarëve.
Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe NISMA nuk po i japin votën kandidates së propozuar për kryetare nga Lëvizja Vetëvendosje, Guxo e Alternativa.
Albulena Haxhiu në gjashtë tentime ka dështuar të kalojë provimin dhe në mungesë të kësaj Lëvizja Vetëvendosje, Guxo e Alternativa po kërkojnë komision për votim të fshehtë, për të cilën gjë Aleanca për Ardhmërinë e Kosovës ka kërkuar interpretim nga Gjykata Kushtetuese.
Kujtojmë se zgjedhjet parlamentare janë mbajtur më 9 shkurt. Mbledhja e parë për konstituimin e Kuvendit të ri është mbajtur më 15 prill. Që nga ajo datë çdo 48 orë po mbahen vazhdime të seancës konstituive pa arritur ndonjë rezultat konkret.
Lini një Përgjigje