FLASH
Shkruar nga Pamfleti
Gazetari Elton Tozaj, i cili u dhunua pak ditë më parë, ka folur pas dhunës së përjetuar në emisionin “Shqipëria Live”.
Ish-banori i Big Brother ka rrëfyer momentet para dhe pas ngjarjes së rëndë.
Tozaj ka treguar se kishte lënë një takim me persona që, sipas tij, e kishin kërcënuar më herët, me qëllim për të sqaruar situatën dhe reagimin e tij ndaj lajmeve që kishte publikuar.
Ai thekson se në takim ka shkuar me mirëbesim, pa e menduar se çfarë mund të ndodhte.
Sipas gazetarit, sapo është takuar me ta, ai është sulmuar dhe nuk mban mend asgjë nga momentet e dhunës. Kujton vetëm një fjali që i është thënë gjatë ngjarjes: “Kush je ti që do të ndryshosh botën?”
Kur ka rifituar ndjenjat, ai ka kuptuar se ndodhej i shtrirë në rrugë dhe ka tentuar të largohej për të kërkuar ndihmë.
“Kam pasur kërcënime më parë. Me mirëbesim lashë takim me ta, pa e ditur çfarë më priste. Kur u zgjova, e pashë veten në rrugë dhe u largova me vrap. Kam përshtypjen se më kanë lënë për të vdekur. Mendoj se goditjet kishin për qëllim të më frikësonin dhe të më largonin nga ekrani,” u shpreh Tozaj.
Gazetari tha se ende nuk ka bërë një denoncim zyrtar, por pret një kontakt nga Prokuroria, ndërsa theksoi se ndjen frikë të vazhdueshme për sigurinë e tij dhe të nënës së tij.
Ngjarja ka rikthyer në vëmendje shqetësimet mbi sigurinë e gazetarëve dhe presionet me të cilat ata përballen për shkak të punës së tyre.
Lini një Përgjigje