FLASH
Shkruar nga Pamfleti
Anëtarët e një bande rumuno-shqiptare janë dënuar me burg në përfundim të një procesi gjyqësor nga Gjykata e Kurorës në Newcastle. Dënimet variojnë nga 18 muaj deri në 14 vjet.
Gjykata e Kurorës në Newcastle dëgjoi se si katër rumunë dhe një shqiptar shënjestronin vajza në Saltëell Park, Gateshead, midis viteve 2015 dhe 2019, duke i ngacmuar seksualisht dhe përdhunuar.
Një nga gjashtë viktimat ishte një vajzë 14-vjeçare, e cila u bë e varur nga kokaina që i ishte dhënë nga banda dhe më pas shitej për seks, thanë prokurorët.
E quajtur Vajza B për të mbrojtur anonimatin e saj, ajo tha në gjykatë se "nuk e di nëse do të jetoj ndonjëherë një jetë normale. Jam gjithë kohës në ankth, veçanërisht nëse jam vetëm." Ajo shtoi se ndihej e mbingarkuar dhe qante shpesh.
Gjykatësi Tim Gittins u drejtoi një mesazh vajzave që vuajtën abuzimin. "Shpresoj që ata ta mendojnë veten, siç mendoj unë, si të mbijetuar, jo si viktima", tha ai.
Codrin Dura, 27 vjeç, u dënua me 13 vjet burg për dy akuza për përdhunim, tre akuza për aktivitet seksual me një fëmijë, tentativë përdhunimi, shantazh dhe sulm seksual, të gjitha në lidhje me një vajzë të njohur si Vajza A për të mbrojtur identitetin e saj. Dura u shpall gjithashtu fajtor për dy akuza për përdhunimin e një vajze të dytë, Vajzës B, dhe u dënua për organizimin e kryerjes së një krimi seksual me fëmijë dhe furnizimin me drogë të Klasit A.
Leanoard Paun, 24 vjeç, u dënua me 5 vjet e një muaj burg për aktivitet seksual me një fëmijë dhe një akuzë për përdhunim në lidhje me Vajzën B, dy akuza për organizim të kryerjes së një vepre penale seksuale me fëmijë, shpërndarje të një imazhi të pahijshëm të një fëmije dhe furnizim me drogë të Klasit A.
Gjykata dëgjoi se veprat penale u kryen kur Paun ishte midis 15 dhe 17 vjeç, dhe gjykatësi Gittins tha se ai kishte kërkuar t’i “përçmonte” viktimat e tij dhe kishte përdorur alkool dhe drogë për t’i ngacmuar ato.
Bogdan Gugiuman, 44 vjeç, u dënua me 14 vjet burg për tre akuza për përdhunim që lidheshin me Vajzën B dhe u dënua për furnizim me drogë të Klasit A. Gjykatësi tha se ai nuk tregoi "asnjë shprehje pendimi" për atë që i bëri vajzës, e cila ishte 14 vjeç në atë kohë.
Shtetasi shqiptar Klaudio Aleksiu, 28 vjeç, u dënua me 6 vjet burg për një akuzë për përdhunimin e vajzës B dhe furnizimin me drogë të Klasit A. Ai ishte 21 dhe 22 vjeç në kohën e kryerjes së veprave penale.
Stefan Ciuraru, 23 vjeç, u dënua me 18 muaj burg për katër akuza për sulm seksual ndaj vajzave B, C dhe D, aktivitet seksual me një fëmijë, vajzën E, dhe nxitje të një fëmije, vajzës F, për t'u angazhuar në aktivitet seksual. Gjykatësi tha se Ciuraru, i cili ishte midis 15 dhe 16 vjeç në kohën e krimeve, "i kishte shënjestruar pa pushim" viktimat e tij dhe mendonte se kishte "të drejtë" të sillej në këtë mënyrë.
Ai shtoi se kombësitë e të pandehurve ishin “të parëndësishme për procesin e dënimit” dhe mosha e shumicës së tyre në kohën e kryerjes së veprave penale vendoste “një kufizim të konsiderueshëm në dënimet e dhëna”.
Lini një Përgjigje