FLASH
Shkruar nga Pamfleti
Grupi i “Homeland Justice” mesa duket nuk kanë të ndalur, pasi deri më tani kanë hakuar 2 kompani shumë të rëndësishme të cilat kanë të dhëna personale të shumë qytetarëve të Shqipërisë si dhe faqen e Parlamentit shqiptar...
Pas “One Albania” dhe “Air Albania”, hakerat e 'Homeland Justice' kanë hakëruar edhe faqen e Parlamentit shqiptar.
Nëse provoni të futeni në www.parlamenti.al, do t’ju shfaqet njoftimi që kjo faqe nuk mund të aksesohet.
Ndërkohë, Homeland Justice ka marrë përsipër sulmin në 3 faqet e hakuara.
Përmes një njoftimi në Telegram, “Homeland Justice” kërcënon se deputetët e korruptuar do të shkatërrohen së shpejti.
“Do të paguajnë edhe uzurpuesit e sediljeve të Kuvendit. Deputetët e korruptuar së shpejti do të shkatërrohen kur të kuptojnë se si demoni i tyre i brendshëm po i demonstrohet çdo kërkuesi të së vërtetës”, thuhet në njoftim.
Kujtojmë se më herët grupi njoftoi se ka hakuar kompaninë celulare “One Albania” dhe "Air Albanian”.
Ata njoftuan se kanë akses te të gjitha të dhënat e kompanive.
Grupi i hakerave iranianë kanë njoftuar paraditen e sotme se kanë vënë në shënjestër sistemet e kompanisë celulare “One Albania” dhe kanë në dorë të dhënat e mijëra shqiptarëve.
Grupi ka njoftuar në Telegram se ka marrë dhe asgjësuar të dhëna deri në 2 petabajt (2 petabytes). Për njohësit e teknologjisë, kjo është ndër njësitë më të mëdha të matjes së të dhënave kompjuterike.
“Homeland Justice” paralajmëroi se shumë shpejt do publikojnë të tjera informacione lidhur me sulmet e tyre.
Lini një Përgjigje