FLASH
Shkruar nga Pamfleti
Sheshi 'Skënderbej' po mbushet gradualisht me qytetarë ndërsa ora i afrohet 19:00, kur do të nisë zyrtarisht protesta e 22-të masive para Kryeministrisë. Për tre javë me radhë, Shqipëria nuk ka pushuar së trondituri, dhe sot pritet kulmi i mobilizimit qytetar, me diasporën që ka "pushtuar" sërish Tiranën për të kërkuar dorëheqjen pa kushte të kryeministrit Edi Rama.
Revolta që nisi si një thirrje e izoluar, tashmë është shndërruar në një lëvizje kombëtare. Protestuesit nuk kërkojnë vetëm largimin e qeverisë, por një pastrim të thellë të skenës politike. Korrupsioni, keqqeverisja, mungesa e llogaridhënies dhe largimi masiv i të rinjve nga vendi janë sot në qendër të një pakënaqësie që ka tejkaluar çdo kauzë fillestare.
Diaspora, besnike motos "Kur Shqipëria thërret, bijtë përgjigjen", ka zbritur masivisht në kryeqytet, duke treguar se revoltën nuk e ndajnë kufijtë. Prania e tyre është një mesazh i qartë: pakënaqësia ndaj qeverisë nuk njeh më kompromise.
Tubimi do të nisë në orën 19:00 te sheshi 'Skënderbej', për të vijuar më pas me një marshim drejt Kryeministrisë, aty ku qytetarët do të vendosen sërish përballë pushtetit, duke i kërkuar atij që të largohet një herë e mirë.
Dita e sotme, e 22-ta radhazi, shihet si një provë e rëndësishme për vazhdimësinë e kësaj lëvizjeje qytetare, e cila prej tre javësh ka mbajtur Shqipërinë në një gjendje tensioni dhe ka vënë në pikëpyetje të gjithë ekuilibrin politik në vend. Gjithçka pritet të vendoset në orët në vijim, ndërsa sheshi po mbushet dhe zëri i protestuesve po bëhet gjithnjë e më i fuqishëm.
Shqipëria nuk pret më!
Lini një Përgjigje