FLASH
Shkruar nga Pamfleti
Adolfo Macias, i njohur me nofkën "Fito", konsiderohet trafikanti më i fuqishëm i drogës në Ekuador dhe kreu i organizatës kriminale "Coneros". Ai u arrestua në fund të qershorit në qytetin e Mantës , pas 18 muajsh në arrati, ndërsa tani ka dhënë pëlqimin për ekstradimin e tij në Shtetet e Bashkuara, ku akuzohet për trafik kokaine dhe armësh.
Arrestimi i tij shënoi fundin e një periudhe ndjekjeje të profilit të lartë, pas arratisjes së tij spektakolare në janar 2024 nga një burg i sigurisë maksimale në Guayaquil, ku ai po vuante një dënim me 34 vjet burg për pjesëmarrje në krim të organizuar, trafik droge dhe vrasje.
Gjatë seancës dëgjimore, e cila u mbajt nëpërmjet videokonferencës nga qelia e tij, "Fito" u shfaq i veshur me një uniformë portokalli, me mjekër të gjatë, dhe u përgjigj monotonisht "po, pranoj", kur u pyet nga trupi gjykues në lidhje me ekstradimin e tij.
Me vendimin e gjykatës, procesi i transferimit të tij në SHBA tani mund të vazhdojë. E tëra çfarë pritet është firma zyrtare e Presidentit Daniel Noboa për të dhënë dritën jeshile për transferimin.
Sipas autoriteteve, ky është ekstradimi i parë i një shtetasi ekuadorian në SHBA që kur legjislacioni përkatës u rishikua përmes një referendumi në vitin 2024, një masë që ishte pjesë e strategjisë së Presidentit Noboa për të luftuar krimin e organizuar.
Arratisja e Fitos shënoi fillimin e një vale dhune të paparë në vend: dhjetëra vrasje, shpërthime, rrëmbimi i më shumë se 200 policëve dhe zyrtarëve të burgjeve, madje edhe një pushtim i një televizioni nga persona të maskuar. Në maj, prokurori që po hetonte rastin e fundit u vra.
Në kulmin e krizës, presidenti e shpalli Ekuadorin në një gjendje "konflikti të brendshëm të armatosur", duke mobilizuar ushtrinë për të shtypur organizatat kriminale, të cilat u njohën zyrtarisht si grupe terroriste.
Ekuadori është bërë një pikë kyçe tranziti për tregtinë globale të kokainës vitet e fundit, për shkak të vendndodhjes së tij gjeografike, midis Kolumbisë dhe Perusë, dy vendeve më të mëdha prodhuese të kokainës në botë, por edhe ekonomisë së saj të dollarizuar dhe porteve strategjikisht të rëndësishme në Paqësor.
Aktivitetet kriminale të "Fitos" u zgjeruan brenda dhe përtej kufijve, duke kulmuar me lidhjen e tij me vrasjen e kandidatit presidencial Fernando Villavicencio në gusht 2023.
Lini një Përgjigje