FLASH
Shkruar nga Pamfleti
Argjentina i ka urdhëruar të ngarkuarit me punë të ambasadës iraniane, Mohsen Soltanin Tehrani të largohet nga vendi brenda 48 orëve. Ky vendim vjen pasi Teherani kritikoi Argjentinën për përcaktimin e Korpusit të Gardës Revolucionare Islamike (IRGC) si një organizatë terroriste.
Ministria e Jashtme e Argjentinës e shpalli Mohsen Soltanin Tehrani person të padëshiruar dhe tha se Irani kishte bërë akuza të rreme, ofenduese dhe të pabaza kundër Republikës së Argjentinës dhe autoriteteve të saj më të larta.
Në një deklaratë të lëshuar nga ambasada e saj në Uruguai të mërkurën, Irani e kritikoi vendimin e Argjentinës për ta shpallur IRGC-në një organizatë terroriste si "të paligjshme dhe të pabazuar" dhe paralajmëroi se ky veprim do të dëmtonte marrëdhëniet dypalëshe.
Irani tha gjithashtu se aleati i Trump, presidenti argjentinas Javier Milei dhe ministri i jashtëm Pablo Quirno ishin bërë “bashkëpunëtorë në krimet e kryera dhe përfunduan në anën e gabuar të historisë” duke u rreshtuar me sulmet e SHBA-së dhe Izraelit, të cilat filluan në fund të shkurtit.
Ministria e Jashtme e Argjentinës tha të enjten se nuk do të tolerojë fyerje ose ndërhyrje nga një shtet që ka dështuar sistematikisht të përmbushë detyrimet e tij ndërkombëtare dhe që vazhdon të pengojë përparimin e drejtësisë.
Lini një Përgjigje