FLASH
Shkruar nga Pamfleti
Irani ka pothuajse gati një draft-protokoll me Omanin për të vendosur një regjim të ri monitorimi dhe lundrimi në Ngushticën e Hormuzit, njoftoi sot pasdite zëvendësministri i Jashtëm iranian Kazem Gharibabadi.
Sipas agjencisë zyrtare të lajmeve IRNA, Gharibabadi deklaroi se drafti i protokollit është në fazat e fundit të përgatitjes. Sapo të finalizohet, Irani do të nisë negociatat zyrtare me Omanin për të arritur një marrëveshje të përbashkët.
“Drafti i këtij protokolli është aktualisht në fazat e fundit të përgatitjes. Sapo ta kemi gati, do të fillojmë negociatat me Omanin në mënyrë që të hartojmë një protokoll të përbashkët”, i tha Gharibabadi agjencisë Sputnik.
Zëvendësministri shpjegoi se protokolli i ri parashikon që, në kohë paqeje, të gjitha anijet që kalojnë nëpër Ngushticën e Hormuzit të kenë marrëveshje të plota me shtetet bregdetare, Iranin dhe Omanin, si dhe të marrin paraprakisht lejet dhe licencat e nevojshme.
Ngushtica e Hormuzit është një nga rrugët detare më strategjike në botë, nëpër të cilën kalon rreth 20% e naftës së transportuar me anije në nivel global. Çdo ndryshim në regjimin e lundrimit në këtë zonë ka implikime të rëndësishme për sigurinë energjetike ndërkombëtare.
Lini një Përgjigje