FLASH
Shkruar nga Pamfleti
Komanda Qendrore e Shteteve të Bashkuara (Centcom) ka njoftuar se forcat amerikane po zbatojnë një bllokadë detare ndaj porteve iraniane, duke rritur ndjeshëm tensionet në rajonin e Gjirit.
Sipas deklaratës zyrtare, që nga nisja e operacionit të hënën, 23 anije janë detyruar të ndryshojnë kurs dhe të kthehen, pasi iu bindën urdhrave të forcave amerikane.
“Forcat amerikane po zbatojnë një bllokadë detare kundër anijeve që hyjnë ose dalin nga portet dhe zonat bregdetare iraniane”, thuhet në deklaratën e Centcom.
Ky zhvillim vjen pasi Irani kishte njoftuar më herët rivendosjen e një “kontrolli të rreptë” në Ngushticën e Hormuzit, duke e lidhur këtë masë me bllokadën e vazhdueshme të SHBA-së.
Në kuadër të operacionit, Centcom bëri të ditur se helikopterë Apache po patrullojnë në dhe përreth ngushticës, duke siguruar një prani të dukshme ushtarake në mbështetje të asaj që e cilëson si “liri të lundrimit”.
Situata në një nga rrugët më të rëndësishme të transportit të energjisë në botë mbetet e tensionuar, ndërsa lëvizjet e fundit të të dyja palëve rrisin rrezikun për përshkallëzim të mëtejshëm.
Lini një Përgjigje