FLASH
Shkruar nga Simone Canettieri
Mungesa e kryeministres italiane në samitin për Ukrainën dhe Ballkanin po nxit interpretime të reja mbi marrëdhëniet me Parisin, Berlinin dhe Londrën. Formati E3 po avancon pa Romën, ndërsa rriten tensionet diplomatike për dosje delikate si Bosnja. Palazzo Chigi flet për një zgjedhje organizative, por skena europiane po bëhet gjithnjë e më e fragmentuar.
Sa shumë gjeopolitikë fshihet pas një pulle poste. Vendimi i kryeministres Giorgia Meloni për të marrë pjesë në një ceremoni për inaugurimin e një pulle të re postare në Prefekturën e Reggio Calabria, me rastin e përvjetorit të Armatës së Karabinierëve (një takim që fillimisht nuk ishte parashikuar në agjendë), nxjerr në pah divergjencat mes saj dhe tre liderëve të koalicionit të “Të Gatshmëve” (Franca, Gjermania dhe Britania e Madhe), të cilët të nesërmen do të takohen në Londër me presidentin ukrainas Volodymyr Zelensky, pa Italinë.
Do të ishte pothuajse e vetëkuptueshme të flitej për ftohje, nëse këtu nuk do të bënte kaq shumë “vapë politike”. Në thelb, nga qeveria theksohet se “ky format E3 po has vështirësi”. Ai mbetet gjithashtu “i largët” në qasje nga ajo e Melonit kur bëhet fjalë për dërgimin e trupave në Ukrainë, për hapjen e negociatave të paqes me Rusinë pa SHBA-të, apo për përshpejtimin e anëtarësimit të Kievit në BE.
A mund të ketë shërbyer ceremonia për një pullë poste si sebep për anulimin e pjesëmarrjes së kryeministres në samitin BE–Ballkan për zgjerimin (një temë shumë e rëndësishme për të)? Nga qeveria e mohojnë dhe hedhin poshtë çdo aludim.
Megjithatë, në atë takim, kryeministrja do të kishte takuar, ndër të tjerë, presidentin francez Emmanuel Macron dhe kancelarin gjerman Friedrich Merz, dy nga “makinistët” e boshtit udhëheqës për Ukrainën që nuk përfshin Romën dhe që ndoshta nuk i pëlqen shumë as Shtëpisë së Bardhë të Donald Trumpit.
“Do të shohim se çfarë do të ndodhë”, thonë nga ekzekutivi me një dozë skepticizmi, pa dashur t’i japin shumë peshë një rasti që megjithatë mbetet i vështirë për t’u zbutur. Marrëdhëniet Itali–Francë vazhdojnë të jenë konkurruese. Tani është edhe gara me Macron për postin e Përfaqësuesit të Lartë për Bosnjën. Në garë janë ambasadori italian Antonio Zanardi Landi dhe i dërguari special francez për Ballkanin, René Troccaz.
I pari gëzon mbështetje të fortë nga SHBA-të, me mbështetje edhe nga Japonia dhe Turqia. I dyti gëzon mbështetjen e Gjermanisë dhe Britanisë së Madhe. Ky detaj aleancash e rikthen në vëmendje përpjekjen e Melonit për të ripërtërirë marrëdhëniet me administratën Trump, pas një periudhe më të trazuar në prag të samitit të G7 në Francë dhe atij të NATO-s në Turqi. Kjo shpjegon edhe vizitën e Ministrit të Mbrojtjes Guido Crosetto në Uashington të hënën, më 15 qershor, kur do të takohet me kreun e Pentagonit Pete Hegseth (të dy kanë folur tashmë javën e kaluar gjatë një darke në samitin e Singaporit).
Por a fshihet vërtet gjithë ky skenar i ndërlikuar pas mungesës së Melonit, apo bëhet fjalë vetëm për një vonesë “banale” organizative? Versioni i Palazzo Chigi hedh poshtë çdo dyshim. Nuk ka asnjë krizë diplomatike, është linja zyrtare, që shpjegon mungesën e djeshme në Tivat të Malit të Zi, një vend që megjithatë ka tërhequr vëmendjen në portin e blinduar dhe të mbushur me jahte dhe forca policore.
“Ne kemi qenë thjesht tepër ambiciozë me agjendën tonë. Ceremonia kushtuar Armatës u zgjat më shumë se sa ishte parashikuar, edhe për shkak të pritjes ndaj kryeministres, dhe kur kuptuam se nuk do të mbërrinim në kohë, e pranuam ftesën në prefekturë, kaq”, shpjegon qeveria.
Meloni ishte e parashikuar të mbërrinte në Mal të Zi në orën 15:00 të së premtes sipas agjendës së saj (samiti do të përfundonte 30 minuta më pas), në kohë për të marrë pjesë në sesionin e fundit të punimeve dhe më pas në foton familjare që i paraprin konferencës së përbashkët të Ursula von der Leyen dhe António Costa.
Por, pas ceremonisë në Reggio Calabria që përfundoi pas orës një, kryeministrja vendosi “me keqardhje” të mos marrë pjesë në eventin ndërkombëtar (duke njoftuar presidentin e Malit të Zi Milatović dhe Costa), dhe shkoi në Prefekturë ku qëndroi rreth 30 minuta për ceremoninë e inaugurimit të pullës së re postare.
Në orën 14:00, avioni shtetëror me të gjithë stafin e saj, përfshirë këshilltarët diplomatikë dhe ushtarakë, u kthye drejt Romës. Ai u ul në kryeqytet në orën 15:30 dhe kryeministrja nuk është parë të hyjë pasdite në Palazzo Chigi./ Përshtati" Pamfleti" nga “Corriere della Sera”
Lini një Përgjigje