FLASH
Shkruar nga Pamfleti
Katër ushtarë dëshmojnë për ekzekutime, tortura dhe misione që i përshkruajnë si vetëvrasëse në vijën e frontit në Ukrainë
Paralajmërim: Ky artikull përmban përshkrime të dhunës ekstreme dhe referenca për vetëvrasje...
Katër ushtarë rusë kanë ekspozuar për BBC-në ashpërsinë dhe brutalitetin e kushteve në anën e tyre të vijës së frontit në Ukrainë. Dy prej tyre i thanë BBC-së se panë ushtarë të ekzekutoheshin në vend për refuzim urdhrash.
Njëri prej tyre i tha ekipit të dokumentarit se pa një ushtar të ekzekutohej me urdhër të komandantit të tij, i cili u shpall “Hero i Rusisë” në vitin 2024.
“E pashë, vetëm dy metra, tre metra larg… klik, krak, bam,” tha ai.
Një tjetër ushtar, nga një njësi tjetër, thotë se pa komandantin e tij të qëllonte vetë katër burra.
“I njihja,” thotë ai për ushtarët e ekzekutuar. “Më kujtohet njëri prej tyre që bërtiste: ‘Mos qëllo, do të bëj gjithçka!’”
Njëri prej tyre thotë gjithashtu se pa 20 trupa ushtarësh të shtrirë në një gropë pasi ishin “zeroed” nga shokët e tyre. Termi “zero” është zhargon ushtarak rus për ekzekutimin e ushtarëve të vet.
Në dokumentarin “The Zero Line: Inside Russia's War”, burrat japin dëshmi të detajuara për mënyrën se si u torturuan pasi refuzuan të merrnin pjesë në sulme që i përshkruajnë si misione që i afroheshin vetëflijimit. Ushtarët rusë i quajnë këto sulme “stuhi mishi”, pasi valë burrash dërgohen pa pushim përtej vijës së frontit për të konsumuar forcat ukrainase.
BBC beson se kjo është hera e parë që ushtarë rusë nga vija e frontit deklarojnë publikisht se kanë parë komandantë të urdhërojnë ekzekutime të ushtarëve të tyre.
Njëri prej burrave, i cili kishte për detyrë identifikimin dhe numërimin e të vdekurve, paraqiti lista të detajuara që tregojnë se është i vetmi i mbijetuar nga një grup prej 79 burrash me të cilët u mobilizua. Ai thotë se, pasi refuzoi të shkonte në vijën e parë të frontit, e torturuan dhe urinuan mbi të. Të tjerë në njësinë e tij që refuzuan urdhrat, sipas tij, u goditën me elektroshok, u lanë pa ushqim dhe më pas u detyruan të merrnin pjesë në “stuhi mishi” të paarmatosur.
Katër burrat, të cilët janë në arrati, rrëfyen për tmerret që panë në një vend të padeklaruar jashtë Rusisë.
Pothuajse çdo kundërshtim publik ndaj pushtimit të Ukrainës nga Presidenti Vladimir Putin është shtypur në Rusi. Moska nuk publikon shifra zyrtare për humbjet, por Ministria e Mbrojtjes e Mbretërisë së Bashkuar vlerëson se më shumë se 1.2 milionë trupa ruse janë vrarë ose plagosur që nga fillimi i pushtimit të plotë më 24 shkurt 2022.
Qeveria ruse deklaron se forcat e saj të armatosura “veprojnë me përmbajtje maksimale, në masën e mundshme në kushtet e një konflikti me intensitet të lartë, duke trajtuar personelin me kujdes maksimal”. Ajo shton se “informacioni për shkelje dhe krime të pretenduara hetohet sipas rregullave përkatëse”.
Autoritetet ruse gjithashtu deklaruan se nuk mund të verifikojnë në mënyrë të pavarur saktësinë ose autenticitetin e informacionit të paraqitur.
Dëshmitë e detajuara nga të katër burrat përforcojnë raportime të mëparshme për shpërbërje të rendit dhe disiplinës në vijën e frontit rus.
Ilya, ushtari që identifikonte dhe numëronte të vdekurit, është një nga ata që thotë se pa shokët e tij të vriteshin nga komandantët.
Para luftës, 35-vjeçari punonte si mësues për fëmijë me nevoja të veçanta dhe autizëm në Kungur, në malet Urale. Në maj 2024, policia shkoi në shtëpinë e prindërve të tij dhe e njoftoi se ishte mobilizuar.
Ai thotë se u mobilizua së bashku me 78 burra të tjerë në një qendër rekrutimi në qytetin e Perm-it.
“Pothuajse të gjithë ishin të dehur,” thotë ai, duke shtuar “përpara në betejë! Do ta kapim Zelenskyn dhe do të ngremë flamurin tonë!”, kujton ai që thërrisnin.
“Po i shikoja dhe mendoja: ‘Si përfundova këtu?’ Isha shumë i frikësuar.”
Me mbërritjen në Ukrainë, Ilya thotë se shumica e burrave u dërguan menjëherë në vijën e parë të frontit. Ai thotë se nuk donte të qëllonte apo të vriste askënd dhe përfundoi në një post komandimi.
Kushtet ishin të ashpra dhe ai thotë se pa katër persona të qëlloheshin nga afër nga një komandant – një në Panteleimonivka dhe tre në Novoazovsk, të dyja në rajonin e Donetskut të pushtuar nga Rusia – sepse kishin braktisur vijën e frontit dhe refuzuan të ktheheshin.
“Gjëja më e trishtueshme është se i njihja. Më kujtohet njëri prej tyre që bërtiste: ‘Mos qëllo, do të bëj gjithçka!’ por ai i zeroi gjithsesi,” thotë Ilya.
Sipas tij, “zeroimi” kryhej zakonisht si ndëshkim për refuzim urdhrash dhe si mjet frikësimi për të tjerët.
“Fati yt varej nga komandanti. Ai ishte në radio: ‘Zeroje këtë, zeroje atë’,” thotë ai.
Ekzekutimet e ushtarëve që refuzonin urdhrat, sipas dëshmive, nuk kufizoheshin vetëm në njësinë e Ilyas.
“Sigurisht që i vrasin njerëzit e tyre, është diçka normale,” thotë Dima.
Para luftës, 34-vjeçari jetonte me gruan dhe vajzën e tij dhe punonte në Moskë si riparues lavatriçesh. Në tetor 2022, ai thotë se po lëvizte nga një punë në tjetrën kur një grup policësh e ndaloi.
“Ata panë pasaportën time, bënë diçka në laptop dhe më thanë: ‘Nëse nuk shkon në ushtri, do të shkosh në burg’,” kujton ai.
Dima thotë se nuk donte të vriste askënd, kështu që, megjithëse nuk kishte përvojë mjekësore, iu bashkua një njësie paramedike. Më vonë u transferua në një brigadë ku evakuonte të plagosurit nga vija e frontit.
Ai thotë se në Brigadën e 25-të pa ushtarë të ekzekutoheshin me urdhër të komandantit të tij.
“E pashë – vetëm dy metra, tre metra larg. Thjesht vrasje, klik, krak, bam. Nuk është dramë, nuk është film, është jeta reale,” thotë ai.
Komandanti i Dimës, Alexei Ksenofontov, u dekorua me “Yllin e Artë”, medaljen më të lartë shtetërore, dhe u shpall “Hero i Rusisë” në vitin 2024.
Megjithatë, Ksenofontov është denoncuar nga familjarë të ushtarëve të vdekur në njësinë e tij. Në një letër të përbashkët në janar 2025, ata iu drejtuan drejtpërdrejt Putinit për të hetuar pretendimet për brutalitet.
Dima e quan Ksenofontovin “kasap”.
“Ai dha shumë urdhra për të vrarë ushtarë, shumë gjak në duart e tij.”
Ai përshkruan gjithashtu se pa trupat e 20 burrave, të ardhur në bazë një natë më parë, të shtrirë në një hendek pasi ishin qëlluar.
“Njëzet djem u sollën tek ne. Thjesht ua morën kartat bankare dhe i vranë,” thotë ai.
BBC thekson se nuk ka qenë në gjendje të verifikojë në mënyrë të pavarur të gjitha pretendimet e paraqitura nga këta burra. /Përshtati Pamfleti/
Rusia nuk eshte aq e forte, por sigurisht eshte me e forte se Ukrahina. Amerika dhe Europa e lane ne balte Ukrahinen duke e furnizuar me pikatore me armatime. Lufta Rusi Ukrahine duhej shpallur si lufte e te keqes(Rusia) me te miren(Ukrahina) dhe te mobilizoheshin gjithe shtetet demokratike per te ndihmuar Ukrahinen me arme dhe ushtare dhe per ta fituar luften shume shpejt.