Bota22 Shkurt 2024, 17:59

"Duan ta varrosin në fshehtësi"/ Nëna e Navalnyt konfirmon se ka parë trupin e djalit të saj, rrëfen se është kërcënuar nga Kremlini

Shkruar nga Pamfleti

"Duan ta varrosin në fshehtësi"/ Nëna e Navalnyt

Lyudmila Navalnaya, nëna e politikanit të opozitës rus Alexey Navalny, i cili vdiq në një koloni penale të Arktikut javën e kaluar, ka deklaruar ditën e sotme se kishte parë trupin e djalit të saj.

Nëna dhe gruaja e Navalny kishin thënë më parë se atyre iu ishte mohuar të shihnin trupin e kritikut të hapur të Kremlinit.

Lyudmila Navalnaya tha se ajo pa trupin e djalit të saj në qytetin Salekhard, pranë burgut ku ai ishte mbajtur që nga dhjetori, dhe se ajo kishte nënshkruar certifikatën e tij të vdekjes. Më tej ajo ngriti pretendimet se hetuesit po e "shantazhonin" atë për të vendosur kushtet e varrimit të djalit të saj.

"Ata po më shantazhojnë, duke më vendosur kushtet se ku, kur dhe si duhet të varroset Alexey", tha ajo në një video të postuar në kanalin YouTube të djalit të saj.

Ajo gjithashtu pretendoi se Komiteti Hetimor Rus, i cili po hetonte rrethanat e vdekjes së djalit të saj, kishte tentuar ta varroste trupin e tij "fshehurazi pa i thënë lamtumirë".

Ajo tha se hetuesit pohojnë se e dinë shkakun e vdekjes dhe se i kanë të gjitha dokumentet ligjore mjekësore.

Nga ana tjetër, gruaja e Navalny, Yulia Navalnaya, kishte akuzuar më herët autoritetet ruse për "fshehjen" e trupit të tij në një përpjekje për të maskuar shkakun e vdekjes së tij. Ajo tha se ata ishin "gënjyer në mënyrë patetike" dhe prisnin që "gjurmët e një tjetër Novichok të Putinit të zhdukeshin".

Kremlini ka thënë se një hetim mbi rrethanat rreth vdekjes së Navalny është “në vazhdim” dhe rezultatet aktualisht janë “të panjohura”. Pretendimet e nënës së Navalny se e kishte parë trupin e tij vijnë pothuajse një javë pasi vdekja e tij u njoftua më 16 shkurt.

Shkaku i vdekjes së tij ende nuk dihet, por lajmi tërhoqi reagime nga udhëheqësit perëndimorë, përfshirë presidentin e SHBA Joe Biden, i cili hodhi fajin ndaj homologut të tij rus, duke thënë se ajo që ka ndodhur me Navalny është edhe më shumë provë e brutalitetit të Putinit./CNN

alexei navalny