FLASH
Shkruar nga Pamfleti
Philippe dhe aleatët e tij besojnë se Le Pen do të jetë një kundërshtare më e vështirë për t’u mposhtur sesa Bardella...
Rikthimi i papritur i udhëheqëses së ekstremit të djathtë, Marine Le Pen, në garën për zgjedhjet presidenciale franceze të vitit 2027 po e detyron një nga kundërshtarët e saj kryesorë, Edouard Philippe, të ndryshojë strategjinë e fushatës.
Pasi e nisi fushatën e tij në maj me premtimin për t’i bindur votuesit për një axhendë konservatore “jashtëzakonisht optimiste”, ish-kryeministri francez dhe ekipi i tij tani po e paraqesin Le Pen si një politikane të majtë dhe fiskalisht të papërgjegjshme.
“Marine Le Pen ka një platformë që, në thelb, është e majtë”, tha Nathalie Loiseau, deputete e Parlamentit Evropian dhe mbështetëse e Philippe.
Kjo nuk është një kritikë e re ndaj Le Pen. Prej kohësh, kundërshtarët e saj në të djathtë e kanë akuzuar partinë e saj, Tubimin Kombëtar (Rassemblement National), për mungesë koherence në politikat ekonomike. Edhe vetë Philippe, gjatë një tubimi të fundit në Paris, e akuzoi partinë për hipokrizi. Megjithatë, tani që kandidatja zyrtare është Le Pen dhe jo Jordan Bardella, 30-vjeçari që konsiderohej më tërheqës për votuesit konservatorë, Philippe dhe ekipi i tij besojnë se kritikat e tyre do të kenë më shumë efekt.
Dënimi i Le Pen për përvetësim fondesh dhe ndalimi pesëvjeçar për të kandiduar në poste publike, i dhënë vitin e kaluar, e kishin vendosur Bardellan në rolin e kandidatit të pritshëm të Tubimit Kombëtar. Në këtë rol, ai u përpoq të zgjeronte mbështetjen për partinë duke promovuar politika më miqësore ndaj biznesit dhe më konservatore nga pikëpamja fiskale.
Megjithatë, apeli i Le Pen përfundoi të martën me një vendim të papritur gjyqësor që i hapi rrugën kandidimit të saj për presidente. Kjo do të thotë se vizioni i saj për një shtet me rol më të madh në ekonomi dhe në mbrojtjen sociale pritet të dominojë programin e partisë.
Philippe dhe aleatët e tij besojnë se Le Pen do të jetë një kundërshtare më e vështirë për t’u mposhtur sesa Bardella, por shprehen të bindur se mund të sfidojnë me sukses programin e saj.
“Le Pen dhe Bardella kanë secili pikat e tyre të forta dhe të dobëta. Le Pen është më me përvojë dhe ka të ngjarë të jetë një kundërshtare më e fortë, por platforma e saj ka mangësi serioze në disa aspekte”, tha deputeti i Horizons, Frédéric Valletoux.
Në krahasim me të, fleksibiliteti ideologjik që Bardella kishte shfaqur në çështjet e politikës ekonomike e bënte atë më tërheqës për votuesit konservatorë në aspektin fiskal, të cilët Philippe dhe kandidatë të tjerë të së djathtës synojnë t’i fitojnë.
Një shembull i qartë është qëndrimi i ndryshëm i dy drejtuesve të ekstremit të djathtë për reformën e pensioneve.
Le Pen mbështet zyrtarisht uljen e moshës minimale të daljes në pension në Francë në 62 vjeç, duke shfuqizuar reformën e debatueshme të presidentit Emmanuel Macron të vitit 2023, e cila parashikon rritjen graduale të saj në 64 vjeç. Ndërkohë, Bardella kishte lënë të kuptohej se partia mund ta rishikonte këtë qëndrim, për shkak të shqetësimeve mbi gjendjen e financave publike të Francës. Sipas Organizatës për Bashkëpunim dhe Zhvillim Ekonomik (OECD), borxhi publik i Francës pritet të rritet nga 115.5% e Prodhimit të Brendshëm Bruto në 203% deri në vitin 2050.
Tani që Bardella nuk është më në garë, partia e Philippe, Horizons, synon ta sulmojë Le Pen për, sipas saj, mospërputhjet dhe mungesën e realizmit të një programi tepër etatist, i cili synon të shfuqizojë reformën e pensioneve dhe t’i bindë qytetarët se mund të punojnë më pak.
Nga ana tjetër, Philippe ka propozuar që mosha e daljes në pension të rritet edhe më tej, përtej asaj që parashikon reforma e Macron. Edhe pse kjo masë nuk pritet të jetë popullore për shumicën e votuesve, ajo mund të tërheqë pikërisht segmentin konservator që Bardella po përpiqej të fitonte.
“Një votues i djathtë që vlerëson sipërmarrjen e lirë dhe disiplinën fiskale e buxhetore ka më pak gjasa të votojë për Marine Le Pen sesa do të kishte për Jordan Bardellan. Edouard Philippe ka mundësi t’i fitojë këta votues”, tha Gilles Boyer, bashkëdrejtues i fushatës së Philippe./Përshtati "Pamfleti" nga "Politico"
Lini një Përgjigje