FLASH
Shkruar nga Pamfleti
Ministrat e jashtëm të vendeve të Grupit të Shtatëshes (G7) i kanë bërë thirrje Iranit që të ndalë menjëherë sulmet në Lindjen e Mesme, duke i cilësuar ato si të pajustifikuara dhe destabilizuese për rajonin.
Në një deklaratë të përbashkët, ata kërkojnë “ndërprerjen e menjëhershme dhe pa kushte të të gjitha sulmeve të kryera nga regjimi iranian”, duke theksuar se përshkallëzimi aktual rrezikon sigurinë rajonale dhe globale.
Reagimi i G7 vjen pas zhvillimeve të fundit në rajon, ku Irani ka ndërmarrë sulme ndaj disa objektivave, si përgjigje ndaj fushatës ajrore të nisur nga SHBA dhe Izraeli në fund të shkurtit. Sipas deklaratës, këto sulme kanë prekur jo vetëm objektiva ushtarake, por edhe infrastrukturë energjetike dhe instalime civile.
Ministrat e jashtëm shprehin gjithashtu mbështetje për vendet e prekura, duke theksuar se “qëndrojmë përkrah partnerëve tanë në Lindjen e Mesme përballë sulmeve të pajustifikuara nga Republika Islamike e Iranit dhe aleatët e saj”.
Në deklaratë vihet në dukje edhe e drejta e këtyre vendeve për vetëmbrojtje. “Ne mbështesim të drejtën e shteteve që përballen me sulme të tilla për të mbrojtur territorin dhe qytetarët e tyre”, thuhet më tej, duke shtuar se mbështetja për sovranitetin dhe integritetin territorial mbetet e palëkundur.
Një tjetër shqetësim i ngritur nga G7 lidhet me situatën në Ngushticën e Hormuzit, një nga korridoret më të rëndësishme për transportin global të naftës. Ministrat theksojnë “rëndësinë e ruajtjes së korridoreve detare dhe sigurisë së lundrimit”, duke paralajmëruar për ndikimin që mund të ketë ndërprerja e trafikut në zinxhirët e furnizimit dhe tregjet e energjisë.
Deri më tani, vendet e prekura nga sulmet iraniane nuk kanë ndërmarrë kundërpërgjigje ushtarake, ndërsa tensionet në rajon mbeten të larta.
Lini një Përgjigje