Bota22 Maj 2023, 17:12

Humbja e thellë në zgjedhjet parlamentare, Tsipras nuk heq dorë: Në raundin e dytë do rikthehemi më të fuqishëm 

Shkruar nga Pamfleti

Humbja e thellë në zgjedhjet parlamentare, Tsipras nuk heq dorë:

Kreu i partisë opozitare greke, Alexis Tsipras mori përgjegjësinë për rezultatin zgjedhor në një deklaratë për mediat, pas përfundimit të mbledhjes së Zyrës Ekzekutive të SYRIZA-s.

Ai theksoi se nuk do të heqë dorë nga beteja dhe se do të udhëheqë partinë në raundin e dytë të zgjedhjeve, teksa shtoi se ka si qëllim të parandalojë transformimin e Kyriakos Mitsotakis në një “kryeministër qeverisës të pakontrollueshëm”.

Tsipras tha ndër të tjera se në raundin e dytë partia e tij do të rikthehet më e fuqishme se kurrë.

“Në zgjedhjet e ardhshme ne kemi përgjegjësinë për të parandaluar perspektivën e një kryeministri të pakontrollueshëm qeverisës. Kam mësuar në kohë të vështira të marr përgjegjësi, dhe për të mos hequr dorë nga lufta. Jam këtu. Nuk do të dorëzohem as tani, as në mes të një beteje të vështirë. Dje ishte dita e zgjedhjeve. Sot është dita e parë e betejës së radhës zgjedhore. Në zgjedhjet e djeshme fitoi ND-ja, por në të njëjtën kohë u mposht strategjia e proporcionalitetit të thjeshtë.

Forcat progresive, të cilave iu drejtuam për bashkëpunim gjatë gjithë periudhës parazgjedhore, kishin një front pothuajse ekskluzivisht kundër SYRIZA-s. Dhe dje, në kohën e një fitoreje historike elektorale të së djathtës, ata festuan më shumë se Demokratët e Ri për rënien e përqindjeve të SYRIZA-s. Në zgjedhjet e ardhshme ne kemi përgjegjësi parësore për të parandaluar perspektivën e një kryeministri të pushtetshëm dhe të pakontrollueshëm.

Por le të mbrojmë prezencën drejtuese të së majtës në jetën politike të vendit, si një forcë e pakompromis. Që vjen nga larg dhe do të shkojë larg, SYRIZA është dhe do të mbetet këtu. Si trupi kryesor i forcave përparimtare dhe shprehës i interesave popullore e shoqërore, për të mbrojtur botën e punës dhe për të mos lejuar rivendosjen e një dypartiake të përshtatshme sistematike”, tha ai.

tsipras zgjedhjet greqi