FLASH
Shkruar nga PamfletiSulmi la të plagosur rëndë biznesmenin Vadym Iermolaiev, partneren e tij dhe djalin 13-vjeçar.Autoritetet besojnë se e dyshuara nuk ka vepruar e vetme.
Interpol ka lëshuar një njoftim të kuq për arrestimin e 39-vjeçares ukrainase Anastasiia Berezovska, e dyshuar si autore e atentatit me bombë që ndodhi këtë javë në Monako dhe që la të plagosur rëndë biznesmenin Vadym Iermolaiev me origjinë nga Ukraina dhe dy anëtarë të familjes së tij.
Në njoftimin e Interpolit, Berezovska përshkruhet si një grua që flet gjermanisht, me flokë të errët dhe me një tatuazh, që dyshohet të jetë në formë gjarpri, në krahun e djathtë nga shpatulla deri te bërryli.
Autoritetet e Monakos e kërkojnë atë për veprat penale të tentativës për vrasje, vendosjes së një mjeti shpërthyes në një rrugë publike me qëllim kriminal dhe pjesëmarrjes në një organizatë kriminale.
Zëvendësprokurori i Monakos, Morgan Raymond, deklaroi se e dyshuara jetonte në Gjermani dhe se, duke pasur parasysh kompleksitetin e pajisjes shpërthyese dhe mënyrën e organizimit të sulmit, hetuesit besojnë se ajo nuk ka vepruar e vetme.
Dy persona u arrestuan në Monako menjëherë pas ngjarjes, por më pas u lanë të lirë, pasi nuk u gjetën prova që t'i lidhnin me atentatin.
Sipas hetimeve, sulmi ndodhi të hënën në mbrëmje në hyrje të një godine banimi mes Bulevardit d'Italie dhe rrugës Révérend Père Louis Frolla, vetëm pak metra larg kufirit me Francën.
Hetuesit dyshojnë se Berezovska vendosi një pako me eksploziv në hyrje të ndërtesës. Rreth orës 21:00, në momentin kur një çift dhe djali i tyre 13-vjeçar hynë në godinë, pajisja shpërtheu.
Megjithëse autoritetet nuk kanë konfirmuar zyrtarisht identitetin e viktimave, burime policore dhe gjyqësore kanë bërë të ditur se bëhet fjalë për biznesmenin Vadym Iermolaiev, 58 vjeç, me origjinë nga Ukraina dhe shtetas i Qipros, partneren e tij dhe djalin e tyre.
Fëmija u dërgua në spitalin pediatrik Lenval në Nicë dhe ndodhet jashtë rrezikut për jetën. Dy të rriturit u transportuan në Spitalin Universitar të Nicës me plagë të rënda.
Autoritetet spitalore kanë bërë të ditur se gjendja e biznesmenit është stabilizuar dhe ai nuk ndodhet më në rrezik për jetën. Ndërsa partnerja e tij vazhdon të jetë në gjendje kritike. Sipas mediave franceze, mjekët janë detyruar t'i amputojnë të dyja këmbët.
Sipas prokurorisë, shpërthimi u aktivizua me telekomandë sapo viktimat hynë në hollin e ndërtesës. Pas atentatit, autorja kaloi në këmbë kufirin me Francën dhe më pas u largua me një automjet të marrë me qira në Gjermani, duke kaluar në disa shtete evropiane, përfshirë Italinë.
Në fazën e parë të hetimeve, policia besonte se autori ishte një burrë me trup të rëndë, i veshur me bluzë të errët me mëngë të gjata, pantallona të shkurtra me ngjyrë të çelët dhe kapelë të zezë. Megjithatë, pamjet e kamerave të sigurisë dhe dëshmitë e mbledhura çuan hetuesit në përfundimin se bëhej fjalë për një grua të maskuar si burrë.
Fotografitë e publikuara nga Interpol tregojnë një grua të veshur me një bluzë të bardhë me vija të errëta. Në njërën prej tyre ajo mban në dorën e majtë një pajisje elektronike me kabllo, e cila dyshohet se lidhet me aktivizimin e eksplozivit.
Burime gjyqësore bëjnë të ditur se e dyshuara është parë më pas në Frankfurt.
Vadym Iermolaiev jeton në Monako të paktën që prej vitit 2021. Ai ndodhet nën sanksionet e Ukrainës që nga dhjetori i vitit 2023 për aktivitetet e tij ekonomike në Krime, territor i aneksuar nga Rusia në vitin 2014.
Autoritetet ukrainase e akuzojnë se ka vazhduar aktivitetin e biznesit të alkoolit në Krime dhe ka paguar taksa në Rusi edhe pas nisjes së pushtimit në shkallë të gjerë të Ukrainës në vitin 2022. Revista ukrainase Forbes e vlerësoi pasurinë e tij në rreth 220 milionë dollarë në vitin 2021.
Atentati ka shkaktuar reagime të forta në Monako, një nga shtetet me përqendrimin më të lartë të milionerëve dhe miliarderëve në botë. Princi Albert II e dënoi sulmin, duke e cilësuar atë si "një akt të neveritshëm" dhe deklaroi se të gjitha institucionet shtetërore janë angazhuar për zbardhjen e plotë të ngjarjes.
Lini një Përgjigje