FLASH
Shkruar nga Pamfleti
Peter Mandelson ka refuzuar kërkesën e Kongresit të Shteteve të Bashkuara për të dëshmuar mbi marrëdhënien e tij me Jeffrey Epstein, financierin e dënuar për krime seksuale.
Sipas gazetës The Telegraph, ish-ambasadori britanik në SHBA e refuzoi ftesën e anëtarëve të Komitetit të Mbikëqyrjes në Dhomën e Përfaqësuesve përmes një letre të dërguar nga avokati i tij.
Demokratët i kishin shkruar Mandelsonit tre javë më parë duke kërkuar që ai të jepte dëshmi si çështje “urgjente”, pasi besonin se ai mund të dispononte “informacione kritike” për Epstein.
Në përgjigje, Mandelson deklaroi se nuk mund të paraqitet, pasi aktualisht është subjekt i një hetimi nga policia britanike nën dyshimin për shpërdorim detyre.
Megjithatë, vendimi pritet të ndikojë më tej në reputacionin e tij. Muajin e kaluar ai dha dorëheqjen nga Dhoma e Lordëve dhe nga Partia Laburiste për shkak të lidhjeve të tij me Epstein.
Kongresi amerikan nuk ka kompetencë të detyrojë dëshminë e shtetasve të huaj që jetojnë jashtë Shteteve të Bashkuara, çka do të thotë se Mandelson nuk kishte detyrim ligjor për t’iu përgjigjur kërkesës dhe nuk përballet me pasoja të tjera ligjore.
Në letrën e siguruar nga The Telegraph, disa ligjvënës demokratë thanë se kanë dalë “prova të shumta” që tregojnë për “lidhje të ngushta të Mandelsonit me Jeffrey Epstein gjatë disa viteve”.
“Edhe pse nuk shërbeni më si ambasador britanik në Shtetet e Bashkuara dhe keni dhënë dorëheqjen nga Dhoma e Lordëve, është e qartë se keni pasur lidhje të gjera shoqërore dhe biznesi me Jeffrey Epstein dhe mund të dispononi informacione kritike për hetimin tonë mbi operacionet e tij”, thuhet në letrën e nënshkruar nga kongresmenët Suhas Subramanyam dhe Robert Garcia.
Lini një Përgjigje