FLASH
Shkruar nga Pamfleti
Ndihmësi i lartë i Kremlinit, Yury Ushakov, tha të enjten se është arritur një marrëveshje që Presidenti i SHBA-së Donald Trump të takohet me homologun e tij rus Vladimir Putin "në ditët në vijim", duke shtuar se palët kanë filluar të punojnë për përgatitjet.
Është "e vështirë të thuhet" se sa do të zgjasin këto përgatitje, vazhdoi Ushakov, por qëllimi është që takimi të zhvillohet javën e ardhshme, raportoi media shtetërore ruse RIA Novosti, shkruan CNN.
Vendi i takimit është gjithashtu i dakordësuar dhe do të shpallet më vonë, tha Ushakov.
Zyrtari i Kremlinit tha se i dërguari special i SHBA-së, Steve Witkoff, diskutoi me Vladimir Putinin , me të cilin u takua dje, mundësinë e një takimi trepalësh midis Putinit, Trumpit dhe Volodymyr Zelenskyt.
"Pas propozimit të palës amerikane, u ra dakord në parim që të mbahet një samit dypalësh në ditët në vijim, domethënë një takim midis Presidentit Vladimir Putin dhe Donald Trumpit. Tani po fillojmë përgatitje specifike së bashku me kolegët tanë amerikanë", tha Ushakov.
Versioni i tij, megjithatë, bie ndesh me rrjedhjet e informacionit nga Shtëpia e Bardhë, pasi dy zyrtarë i thanë CNN se Putin sugjeroi një takim katër me katër.
Takimi mund të zhvillohet javën e ardhshme. Megjithatë, Ushakov vuri në dukje se është ende e vështirë të përcaktohet se sa ditë do të zgjasin përgatitjet për samitin.
Deklarata nga Kremlini vjen pasi Trump tha më herët se kishte “një mundësi të mirë” për të zhvilluar një takim të drejtpërdrejtë me liderët e Rusisë dhe Ukrainës “shumë shpejt”, për të diskutuar një marrëveshje paqeje.
Gjatë një konference për shtyp në Shtëpinë e Bardhë të mërkurën në mbrëmje, Trump u pyet nëse presidenti ukrainas Volodymyr Zelensky dhe Vladimir Putin kishin rënë dakord për një samit trepalësh. Ai u përgjigj se ekzistonte “një perspektivë shumë e mirë”, pa dhënë më shumë detaje.
Komentet e presidentit amerikan erdhën pasi i dërguari i tij, Steve Witkoff, zhvilloi bisedime në Moskë me presidentin Putin, të cilat Trump i përshkroi si “shumë produktive”. Nga ana e saj, Kremlini publikoi një deklaratë të shkurtër, duke i cilësuar bisedimet “konstruktive” dhe duke theksuar se palët kishin shkëmbyer “sinjale”.
Witkoff ka udhëtuar në Moskë katër herë që nga fillimi i vitit dhe pas çdo vizite, Trump ka shprehur optimizëm për një armëpushim të mundshëm. Megjithatë, muajin e kaluar, ai pranoi për BBC se në të katër rastet, Putin e kishte zhgënjyer.
Pavarësisht kësaj, presidenti amerikan tani po mban një ton më të matur, duke deklaruar: “Nuk e quaj një përparim… kemi kohë që punojmë për këtë. Janë mijëra të rinj që po vdesin… Unë jam këtu për t’i dhënë fund kësaj lufte”.
Kujtojmë se të premten skadon afati i vendosur nga Trump për Rusinë që të pranojë një armëpushim në Ukrainë përpara se të përballet me sanksione më të rënda.
Lini një Përgjigje