FLASH
Shkruar nga Pamfleti
Sekretari amerikan i Energjisë, Chris Wright, deklaroi se çmimet e larta të gazit që po paguajnë aktualisht amerikanët janë një sakrificë e përkohshme që, sipas tij, do të sjellë përfitime në afatgjatë.
Në një intervistë për CNN, Wright theksoi se presioni ekonomik dhe ushtarak ndaj Iranit synon të dobësojë aftësinë e Teheranit për të kërcënuar trupat amerikane, aleatët e SHBA-së dhe tregjet globale të energjisë.
“Po dëmtojmë aftësitë e Iranit për të kërcënuar trupat amerikane në rajon, aleatët dhe tregjet globale të energjisë. Ndonjëherë duhet të kalosh dhimbje afatshkurtra për të zgjidhur një problem afatgjatë”, u shpreh Wright, duke e cilësuar këtë si një formë lidershipi të fortë nga Presidenti Donald Trump.
Ndërkohë, nga ana e Iranit ka ardhur një paralajmërim se çmimi i naftës mund të arrijë deri në 200 dollarë për fuçi, dyfishi i nivelit aktual. Kjo deklaratë u bë nga zëdhënësi i Gardës Revolucionare Islamike, Ebrahim Zolfaqari, në një prononcim për Reuters.
Megjithatë, Wright e cilësoi këtë skenar si pak të mundshëm, duke theksuar se SHBA mbetet prodhuesi më i madh i naftës në botë dhe se tregu global ka burime të tjera furnizimi.
Sipas ekspertëve të tregut energjetik, edhe në rast se Ngushtica e Hormuzit do të bllokohej për një periudhë të gjatë, çmimi i naftës mund të arrijë rreth 150 dollarë për fuçi.
Një nivel i tillë do të tejkalonte rekordin historik të vendosur në vitin 2008, periudhë kur rritja e çmimeve të energjisë ishte një nga faktorët që kontribuan në krizën financiare globale.
Lini një Përgjigje