FLASH
Shkruar nga Pamfleti
Çmimi i naftës së papërpunuar ka shënuar një rritje të mprehtë këtë pasdite, duke kaluar kufirin e 100 dollarëve për fuçi dhe duke arritur në rreth 101 dollarë, me një rritje ditore prej rreth 10%.
Kjo rritje vjen si pasojë e tensioneve të përshkallëzuara në konfliktin me Iranin, ku bllokimi i Ngushticës së Hormuzit po pengon transitin e naftës globale.
Udhëheqësi i ri Suprem i Iranit, Mojtaba Khamenei, në mesazhin e tij të parë publik që nga emërimi, theksoi se "leva e bllokimit të Ngushticës së Hormuzit" duhet të vazhdojë të përdoret si mjet presioni ndaj armiqve.
Nga ana tjetër, Sekretari Amerikan i Energjisë, Chris Wright, në një intervistë për CNN të enjten, u pyet nëse çmimi mund të arrinte 200 dollarë, ai deklaroi se nuk ka gjasa të ndodhë.
"Do të thoja se nuk ka gjasa, por ne jemi të përqendruar në operacionin ushtarak dhe zgjidhjen e një problemi", tha ai.
Zhvillimet e fundit kanë shqetësuar tregjet globale, me frikën se bllokimi i vazhdueshëm i ngushticës, përmes së cilës kalon rreth 20% e naftës botërore, mund të çojë në mungesa të mëdha furnizimi dhe rritje të mëtejshme të çmimeve të karburanteve. Ekspertët paralajmërojnë se situata mund të përkeqësohet nëse konfliktet ushtarake nuk de-përshkallëzohen shpejt.
Lini një Përgjigje