FLASH
Shkruar nga PamfletiPedofili i ndjerë kishte një obsesion sekret me eugjenikën. Plani i tij? Të krijonte fëmijë të modifikuar gjenetikisht duke përdorur spermën e vet.
Që nga vdekja e Jeffrey Epstein në vitin 2019, prova pas prove e kanë vendosur atë në qendër të një rrjeti të gjerë seksi, parash dhe ndikimi, ku përfshihen disa nga njerëzit më të pasur dhe më të pushtetshëm të botës.
Por mbi tre milionë dokumente të publikuara javën e kaluar nga Departamenti Amerikan i Drejtësisë (DOJ) tregojnë se përveç prirjeve kriminale seksuale, Epstein ishte thellësisht i fiksuar pas gjenetikës dhe “përmirësimit” të racës njerëzore.
Dosjet e reja zbulojnë biseda raciste dhe seksiste, si edhe një interes obsesiv për “transhumanizmin”, një rrymë filozofike që përfshin ide eugjenike dhe inteligjencë artificiale. Epstein kishte hyrë edhe në diskutime të avancuara për financimin e një kompanie të modifikimit gjenetik dhe ishte i përqendruar te karakteristika racore specifike, si sytë blu.
Ndër shkëmbimet më tronditëse janë ato që lidhen me racën. Epstein, i dënuar për herë të parë në vitin 2008, shprehej hapur për bindjen e tij se njerëzit me ngjyrë janë gjenetikisht më pak të zhvilluar intelektualisht sesa të bardhët.
Në një email të vitit 2016 drejtuar gjuhëtarit dhe aktivistit Noam Chomsky, Epstein shkruante se “hendeku i rezultateve të testeve te afrikano-amerikanët është i dokumentuar mirë” dhe se “përmirësimi i situatës mund të kërkojë pranimin e disa fakteve të pakëndshme”.
Një tjetër shkëmbim emailesh jep një ide më të qartë se çfarë nënkuptonte ai me “fakte të pakëndshme”. Në një bisedë me shkencëtarin gjerman të njohur të kognicionit dhe inteligjencës artificiale, Joscha Bach, i cili në atë kohë punonte në MIT dhe kishte marrë një donacion prej 300 mijë paundësh nga Epstein, sugjerohet se Epstein ishte i interesuar për mundësinë e modifikimit gjenetik të njerëzve me ngjyrë për t’i bërë “më të zgjuar”.
Në një mesazh të korrikut 2016, Bach i shkruan Epstein: “Nëse e kuptoj saktë, ju po sugjeroni […] se mund të jetë e mundur t’i bëni zezakët më të zgjuar duke ndryshuar kohën e zhvillimit të shtresës motorike”.
Biseda mbështetet në një pseudo-teori neuroshkencore sipas së cilës ekzistojnë “shtresa” të zhvillimit kognitiv. Bach pretendon se fëmijët me ngjyrë zhvillojnë aftësi motorike më shpejt se fëmijët e bardhë, por në dëm të zhvillimit kognitiv më të avancuar. Ai e lidh këtë me idenë se afrikanët janë të përshtatur për një stil jetese “gjuetie dhe vrapimi”, ndërsa evropianët për një kulturë bujqësore që kërkon shtyrjen e kënaqësisë.
Epstein e pranon këtë argument dhe më pas kalon nga racizmi në seksizëm, duke bërë pohime edhe për dallime gjinore. Në vijim, Bach shkon edhe më tej, duke sugjeruar se vdekjet masive të të moshuarve dhe të sëmurëve mund të ishin të dobishme për shoqërinë. Epstein nuk e kundërshton, raporton The Telegraph.
Më vonë, Bach është distancuar nga këto ide. Në nëntor, ai i tha Boston Globe se raca nuk është shkak i dallimeve kognitive dhe se nuk përcakton inteligjencën tek fëmijët apo të rriturit.
Disa figura akademike u shkëputën nga Epstein, por të tjerë mbajtën kontakte me të për vite, edhe pasi prirjet e tij kriminale u bënë publike, ashtu siç bënë edhe Princi Andrew dhe Peter Mandelson.
Në vitin 2006, Epstein organizoi një konferencë shkencore në Ishullin St Thomas, në Ishujt e Virgjër Britanikë, ku mori pjesë edhe Stephen Hawking. Edhe pse konferenca kishte si temë teorinë e gravitetit, një pjesëmarrës raportoi se Epstein ishte i fiksuar pas përkryerjes së gjenomit njerëzor dhe trashëgimisë së tipareve “superiore”.
Epstein dhuroi 6.5 milionë dollarë për Programin e Dinamikës Evolutive në Harvard dhe, në vitin 2011, 20 mijë dollarë për Shoqatën Botërore të Transhumanizmit, sot e njohur si Humanity Plus.
Dosjet e fundit e përshkruajnë atë si një njeri të obsesionuar me epërsinë gjenetike, një hebre që bënte shaka për Holokaustin dhe ishte i fiksuar pas tipareve ariane.
Në email-e të shumta, Epstein theksonte dëshirën për “sy blu”, të cilët i konsideronte shenjë inteligjence. Ai i kërkonte këto tipare te gratë që siguronte për seks, por edhe te të ftuarit në evente shkencore. Një dokument liston pjesëmarrësit në një konferencë shkencore, së bashku me ngjyrën e syve të tyre.
Interesi i tij nuk ishte vetëm teorik. Si investitor, Epstein ishte i intriguar nga ideja e “foshnjave të dizajnuara” dhe fëmijëve të modifikuar gjenetikisht. Në një dokument të DOJ-së, ai përshkruan një bisedë me Princin Andrew për klonimin.
“Dua të filloj të klonoj gjëra, veten time”, thotë Epstein. “Princi Andrew u shqetësua dhe tha: ‘Po sikur të ketë ndërgjegje, a mund ta vrasësh për pjesë këmbimi?’ Unë iu përgjigja: ‘Do ta bëj pa kokë, a do të ndihesh më mirë?’”.
Edhe pse toni ishte ironik, Epstein ishte serioz për krijimin e një kompanie të foshnjave të dizajnuara.
Dokumentet përfshijnë një shkëmbim emailesh të vitit 2018 me sipërmarrësin e kriptomonedhave Bryan Bishop, i cili kërkonte financim për një “projekt foshnjash të dizajnuara”. Epstein përgjigjet: “Nuk kam problem të investoj, problemi i vetëm është nëse dukem si drejtues”.
Në email-et e mëvonshme, Bishop përshkruan një plan që do të çonte drejt lindjes së parë të gjallë dhe “ndoshta edhe një kloni njerëzor” brenda pesë viteve. “Bota nuk do të jetë më kurrë e njëjtë”, shkruan ai.
Sipas raportimeve të mëparshme, Epstein planifikonte të përdorte një fermë prej 7,000 hektarësh në New Mexico për të “mbjellë” fëmijë me ADN-në e tij. Ai kishte folur për këtë plan me shkencëtarë dhe të njohur të tjerë, duke synuar që gratë të mbeteshin shtatzëna me spermën e tij.
Nuk ka prova që ky projekt u realizua ndonjëherë. Por dokumentet e fundit forcojnë imazhin e një njeriu thellësisht të errët, ku abuzimi seksual, pushteti, racizmi dhe fantazitë për epërsi gjenetike ndërthureshin në mënyrë të frikshme.
Epstein pretendonte se donte të përmirësonte racën njerëzore, por në realitet ai mbetet një nga shembujt më të shëmtuar të saj.
Lini një Përgjigje