FLASH
Shkruar nga Pamfleti
Trajneri i Anglisë, Thomas Tuchel, deklaroi se ekipi i tij dëshiron t'u japë tifozëve një arsye për të festuar në gjysmëfinalen e Kupës së Botës kundër Argjentinës, duke theksuar se futbolli ka fuqinë t'ua bëjë jetën njerëzve më të bukur, qoftë edhe për 90 apo 120 minuta.
"Deri për këtë shërben Kupa e Botës, për të emocionuar tifozët dhe për t'ua bërë jetën më të bukur njerëzve për 90 ose 120 minuta. Ata duan të përfaqësohen nga skuadra e tyre. Ka shumë gjëra për t'u pëlqyer te kjo Angli dhe jam shumë i lumtur që njerëzit e ndiejnë këtë", tha Tuchel.
Tekniku gjerman pranoi se do të ndiejë emocione përpara ndeshjes, por mohoi se ndjen peshën e pritshmërive për t'i dhënë fund pritjes 60-vjeçare të Anglisë për një titull botëror.
"Nuk e ndiej si barrë. Ka emocion dhe tension, por jo presion. Shoh një grup lojtarësh konkurrues, të uritur për të luajtur këtë ndeshje. Të gjithë e njohin menjëherë fanellën e Anglisë dhe lojtarët tanë. Kjo është bukuria e një ndeshjeje të kësaj përmase", u shpreh ai.
I pyetur për rivalitetin historik mes Anglisë dhe Argjentinës, Tuchel tha se skuadra është e vetëdijshme për rëndësinë e sfidës, por nuk dëshiron të mbetet peng i së kaluarës.
"Lojtarët e dinë çfarë do të thotë kjo ndeshje. Kur një përballje ka momente ikonike në histori, nuk mund të thuash se është thjesht një ndeshje futbolli. Megjithatë, ne nuk flasim për ngjarjet historike. Tensioni i kësaj ndeshjeje është mjaftueshëm i madh edhe pa to", deklaroi ai.
Një pjesë e konferencës iu kushtua edhe kapitenit të Argjentinës, Lionel Messi, të cilin Tuchel e cilësoi si një futbollist të jashtëzakonshëm.
"Është e pabesueshme mënyra se si ai e udhëheq skuadrën. Nuk ka fjalë për të përshkruar arritjet e tij. Kush jam unë të flas për Messin? Ai është lideri dhe lojtari kyç i çdo skuadre ku luan. Argjentina është shumë e bashkuar dhe ka përvojë të madhe në turne. Furnizimi i Messit me topa bëhet në nivelin më të lartë teknik dhe kjo është diçka që duhet ta kemi parasysh", tha trajneri i Anglisë.
Megjithatë, ai theksoi se vëmendja mbetet te skuadra e tij.
"Ne jemi këtu për ta luajtur gjysmëfinalen në mënyrën tonë. E dimë sa e vështirë është kjo sfidë, por jemi gati", shtoi Tuchel.
Trajneri anglez pranoi se nuk ishte i kënaqur me paraqitjen ndaj Norvegjisë në çerekfinale, pavarësisht kualifikimit.
"Bëmë shumë gabime teknike që na penguan të gjenim ritmin. Morëm vendime me nxitim dhe nuk ishim mjaftueshëm të duruar e të disiplinuar. Megjithatë, gjatë turneut kemi përmirësuar mbrojtjen si skuadër dhe kjo do të jetë thelbësore në ndeshjen e radhës. Përshpejtimi i lojës dhe cilësia teknike duhet të jenë në nivel më të lartë. Besoj se një ndeshje si kjo do të nxjerrë më të mirën nga ne dhe nga lojtarët tanë", tha ai.
Në fund, Tuchel konfirmoi se të gjithë futbollistët janë në dispozicion për gjysmëfinalen, përfshirë mesfushorin Declan Rice, i cili u zëvendësua në pjesën e parë të ndeshjes me Norvegjinë për shkak të një gjendjeje jo të mirë shëndetësore.
"Ai është gati për të luajtur nga minuta e parë", përfundoi trajneri i Anglisë.
Lini një Përgjigje