FLASH
Shkruar nga Pamfleti
Presidenti ukrainas Volodymyr Zelensky po kalon një nga periudhat më të favorshme politikisht që prej nisjes së luftës me Rusinë. Një koment i tij gjatë samitit të NATO-s ka marrë jehonë të madhe në Ukrainë, ku është interpretuar si shenjë e një qëndrimi më të sigurt dhe më të vendosur.
Sipas mediave ukrainase, gjatë një bisede Donald Trump e pyeti nëse do të pranonte të shkonte në Moskë për të firmosur një marrëveshje paqeje me Vladimir Putinin. Zelensky iu përgjigj me humor se kjo do të ishte e vështirë, pasi "mbi Moskë fluturojnë shumë dronë ukrainas". Batuta u përhap me shpejtësi në rrjetet sociale dhe u prit pozitivisht nga shumë ukrainas, të cilët e panë si një përgjigje që shfaq besim dhe vendosmëri përballë presioneve diplomatike.
Analistë dhe komentues në Ukrainë e kanë cilësuar këtë episod si një sinjal se Zelensky është rikthyer në profilin e liderit që nuk bën lëshime ndaj Kremlinit dhe që zhvillon dialog me Shtetet e Bashkuara nga një pozicion më i fortë.
Edhe sondazhet e fundit tregojnë një përmirësim të ndjeshëm të mbështetjes për presidentin. Sipas tyre, mbi 60 për qind e qytetarëve e mbështesin Zelenskyn, ndërsa shumica vlerëson se zgjedhjet presidenciale duhet të zhvillohen vetëm pasi të përfundojë lufta. Ky qëndrim i opinionit publik i forcon legjitimitetin politik në një kohë kur vendi vijon të jetë në gjendje lufte.
Rritja e mbështetjes vjen pas një faze më të vështirë për presidentin ukrainas. Popullariteti i tij ishte goditur pas largimit të ish-komandantit të përgjithshëm Valery Zaluzhnyi dhe pas disa rasteve të korrupsionit që prekën bashkëpunëtorë të qeverisë. Zhvillimet e muajve të fundit në front, së bashku me intensifikimin e sulmeve me dronë ndaj objektivave ruse, kanë krijuar bindjen se Ukraina ka rifituar një pjesë të iniciativës ushtarake.
Një tjetër faktor që ka ndikuar në këtë klimë është forcimi i bashkëpunimit me Shtetet e Bashkuara. Shkëmbimi i informacionit mes shërbimeve amerikane dhe ukrainase është zgjeruar, ndërsa po diskutohet edhe prodhimi në Evropë i sistemeve Patriot për nevojat e Ukrainës. Ky projekt konsiderohet me rëndësi strategjike si për mbrojtjen ushtarake, ashtu edhe për industrinë e mbrojtjes.
Edhe raporti mes Zelenskyt dhe Donald Trump duket se ka hyrë në një fazë më pragmatike. Pas tensioneve dhe kritikave të forta gjatë vizitës në Shtëpinë e Bardhë, presidenti ukrainas ka zgjedhur të mbajë të hapur komunikimin me administratën amerikane, duke kërkuar mbështetje të vazhdueshme për Kievin. Paralelisht, ai po përpiqet të paraqitet si drejtuesi i ushtrisë më të madhe evropiane, që negocion në pozita partneriteti me aleatin kryesor të NATO-s.
Nëse kjo prirje vazhdon, Zelensky mund të hyjë në fazën e ardhshme të negociatave ndërkombëtare me një pozicion më të fortë politik dhe diplomatik. Megjithatë, zhvillimet në fushën e betejës dhe vendimet e ardhshme të politikës amerikane do të mbeten faktorët që do të përcaktojnë ecurinë e kësaj dinamike./ Corriere della Sera
Lini një Përgjigje